काठमाडौं । सरकारले कोरोना परीक्षण शुल्क ४ हजार रुपैयाँ मात्र भएको प्रष्ट पारेको छ ।
स्वास्थ्य तथा जनसंख्या मन्त्रालयले आयोजना गरेको नियमित प्रेस ब्रिफिङमा प्रवक्ता प्राडा. जागेश्वर गौतमले पीसीआर ल्याब भएका अस्पतालले कोरोना परीक्षण शुल्क ४ हजार रुपैयाँ मात्र लिनुपर्ने प्रष्ट पारेका हुन् ।
यसअघि ४ हजार ४ सय रुपैयाँ तोकिएको बताइएको थियो । मन्त्रालयको इन्सिडेन्ट कमाण्ड सिस्टमको निर्णय अनुसार ४ सय रुपैयाँ पीसीआर ल्याव नभएका तर स्वाब संकलन गर्ने अस्पताललाई छुट्याइएको हो ।
प्रवक्ता गौतमले भने, ‘जहाँ पीसीआर परीक्षण हुन्छ, त्यसको लागि ४ हजार रुपैयाँ तोकिएको छ । जहाँ स्याम्पल टेष्ट हुँदैन, तर स्वाव संकलन हुन्छ त्यस्तो अस्पतालमा भीटीएम र पीपीईका लागि ४०० रुपैयाँ छुट्याइएको हो ।’
आफै पीसीआर परीक्षण गर्ने ल्याब भएका अस्पतालले ४ हजार रुपैयाँ भन्दा बढी लिन नपाउने गौतमले बताए ।
प्रतिक्रिया