बुटवल । रुपन्देहीको ओमसतिया गाँउपालिका अध्यक्ष हिरा केवट राहुलले आफु र आफ्नो परिवारलाई कोरोना संक्रमण भएकोमा गर्व महसुुस् भएको बताएका छन् । आज आफ्नो फेसबुक मार्फत जनताको सेवा गर्दै गर्दा आफु र आफ्ना परिवारका सदस्यहरुलाई संक्रमण भएको उल्लेख गर्दै कोरोनाका कारण बलिदान (मृत्यु) भएपनि आफ्नो चिन्ता नलिन सबैलाई आग्रह गरेका छन् ।
बुधबार साँझ मात्र गाउँपालिकाका अध्यक्ष राहुल सहित उनकी २० वर्षीया छोरी, ४२ वर्षीय चालक, ५० वर्षीय एकजना वडा सदस्य र ३२ वर्षीय एकजना वडा सचिवमा कोरोना भाइरसको संक्रमण पुष्टि भएको थियो ।
संक्रमण पुष्टि भएपछि होम आइसोलेशनमा सुरक्षित रुपमा बसेको बताउंदै उनले आफु सहित परिवारमा कसैलाई पनि लक्षण नदेखिएको बताए ।
पालिका अध्यक्ष, वार्ड अध्यक्ष र केहि वडा सदस्य सहित कर्मचारीमा संक्रमण पुष्टि भएपछि गाउँपालिकाको कार्यालय भदौ २० गतेसम्मका लागि बन्द गरिएको छ । कार्यालयमा अत्यावश्यक सेवा बाहेकका सबै सेवा बन्द गरिएको सुचना मार्फत गाँउपालिकाले जानकारी दिएको छ ।
प्रतिक्रिया