काठमाडौं । सत्तारुढ नेपाल कम्युनिष्ट पार्टी नेकपाका उपाध्यक्ष वामदेव गौतमलाई राष्ट्रिय सभामा मनोनित गर्न सरकारले राष्ट्रपतिसमक्ष सिफारिस गरेको छ ।
प्रधानमन्त्री कार्यालयले राष्ट्रपति समक्ष गौतमको मनोनय सिफारिसका लागि बुधबार पत्र पठाएको हो ।
राष्ट्रिय सभामा राष्ट्रपतिबाट मनोनित हुने एक कोटा बाँकी छ । सत्तारुढ नेकपाले गौतमलाई सोही पदमा मनोनयन गर्नुपर्ने निर्णय गर्दै सरकारलाई अनुरोध गरेको थियो ।
नेकपाको निर्णयअनुसार सरकारले राष्ट्रपतिलाई सिफारिस गरेको हो । राष्ट्रपतिले मनोनित गरेपछि गौतमले राष्ट्रिय सभा अध्यक्षबाट सपथ ग्रहण गर्नेछन् । राष्ट्रपतिले गौतमलाई आजै मनोनयन गर्ने स्रोतले बताएको छ ।
पूर्व अर्थमन्त्री डा. युवाराज खतिवडाको दुई वर्षे कार्यकाल सकिएपछि सो पद गत फागुनदेखि नै रिक्त रहेको थियो । तर, नेकपाभित्रको आन्तरिक किचलोका कारण सरकारले सिफारिस गरेको थिएन ।
नेकपाको गत फागुन १४ गते बसेको सचिवालय बैठकले सो पदमा गौतमलाई लैजानुपर्ने निर्णय गरेको थियो । प्रधानमन्त्री केपी शर्मा ओलीले भने युवराज खतिवडालाई नै निरन्तरता दिन चाहेका थिए । विवादकै कारण राष्ट्रियसभाको एक पद ६ महिनासम्म रिक्त रह्यो भने खतिवडा विना सांसद ६ महिनासम्म मन्त्री भए ।
प्रतिक्रिया