कावासोती । नाराययणी नदीमा पानीको सतह खतराको विन्दुभन्दा माथि पुगेको छ । नारायणी नदीमा पानीको सतह बढेपछि तटीय क्षेत्रका बासिन्दालाई स्थानीय प्रशासनले सतर्क गराएको छ ।
पूर्वी नवलपरासीको कावासोती, देवचुली, मध्यविन्दु र विनयी त्रिवेणीका बाढी प्रभावित क्षेत्रका स्थानीयलाई प्रशासनलेले सतर्क रहन आग्रह गरेको हो । यसैगरी, चितवन जिल्ला प्रशासनले पनि नदी आसपासका क्षेत्रका जनतालाई सुरक्षित हुन सचेत गराएको छ ।
माथिल्लो जलाधार क्षेत्रमा निरन्तर वर्षा भएपछि नारायणी नदीको सतह बढेको हो । बिहीबार बिहान ९:२५ बजे देवघाटमा नदीको सतह ८ दशमलव ०६ मिटर पुगेको छ ।
त्यहाँ ८ मिटर पानीको सतहलाई खतराको सूचक मानिन्छ । जल तथा मौसम विभागका अनुसार नारायणघाट–गैंडाकोटस्थित नारायणी नदीको पुलमा भने ११ दशमलव ३ मिटर पुगेको छ । त्यहाँ ११ मिटरलाई सतर्कताको विन्दु मानिन्छ ।
नारायणी नदीका सहायक नदीको जलाधार क्षेत्रमा निरन्तर वर्षा भईरहेकाले नदीको सतह अझै बढ्न सक्ने आँकलन गरिएको छ । निरन्तर वर्षासंगै नदीको सतह बढेपछि गण्डक ब्यारेजका सबै ३६ वटै ढोका खोलिएको छ ।
मानव वस्तीमा क्षति पु-याउन सक्ने भन्दै जिल्ला प्रशासन कार्यलय नवलपरासी पूर्वले नदी तटीय क्षेत्रमा बसोबास गर्नेहरुलाई सुरक्षित र सतर्क रहन आग्रह गरेको जिल्ला प्रशासन कार्यलयका सूचना अधिकारी आनन्द भुसालले बताए ।
नारायणी नदीमा आउने बाढीले पूर्वी नवलपरासी र चितवनको भरतपुर महानगरपालिकाका तटीय क्षेत्रका बासिन्दाहरु प्रभावित हुँदै आईरहेका छन् ।
प्रतिक्रिया