खजुरा । बाँकेको खजुरामा रहेर लामो समय समाजसेवा सहित राजनीतिक नेतृत्व गरेका स्वर्गीय मिलन सापकोटाको सालिक अनावरण गरिएको छ । रेडक्रस खजुरा शाखा परिषरमा निर्मित स्वर्गीय सापकोटाको अर्धकदको सालिक आज एक कार्यक्रमका बीच अनावरण गरिएको हो ।
पञ्चायती व्यवस्थाका बिरोधमा खजुराबाट नेतृत्व गरेका पुराना कम्युनिष्ट नेता एवम समाजसेवी स्वर्गीय सापकोटाको योगदानको स्मरण स्वरुप रेडक्रस खजुरा शाखा परिषरमा खजुरा गाउँपालिकाको मुख्य लगानीमा सालिक निर्माण गरेको हो । रेडक्रसको समेत बिगतमा नेतृत्व गरेका सापकोटा पुष्पलाल समुहबाट राजनीतिमा प्रवेश गरेका सापकोटाले नेकपा माले, एमाले हुँदै पछिल्लो समयमा एकीकृत माओवादीमा आवद्ध रहेका थिए ।
रेडक्रस खजुराको आयोजनामा आज आयोजित एक कार्यक्रमका बीच खजुरा गाउँपालिकाका अध्यक्ष डम्बर विक तुफान, रेडक्रस खजुरा शाखाका अध्यक्ष जिवनाथ सापकोटा, पालिका उपाध्यक्ष मन्जु मल्लले संयुक्तरुपमा सापकोटाको सालिक अनावरण गरे । अनावरण कार्यक्रममा बोल्दै अध्यक्ष विकले खजुराले स्वर्गीय मिलन सापकोटालाई जुगजुगसम्म स्मरण गरिरहने बताए । उनले खजुरामा पहिलो राजनीतिक व्यक्तित्वको सालिक स्थापना भएको जनाउँदै सापकोटाको राजनीतिक योगदानको चर्चा गरे ।
रेडक्रस खजुरा शाखाको अध्यक्ष जिवनाथ सापकोटाले समाजवेवामा स्वर्गीय सापकोटाको लगाव निस्वार्थ र अनवरत रहेको स्मुण गरे । स्वर्गीय सापकोटाकी धर्मपत्नी भगवती सापकोटाले स्वर्गीय मिलन सापकोटाको समर्पणको मुल्यांकन गरेकोमा स्थानीय सरकार र सम्बद्ध सबैलाई धन्यवाद प्रकट गरिन् ।
खजुरा गाउँपालिकाको १ लाख ४० हजार, रेडक्रस खजुराको ३५ हजार, घरपरिवारबाट ३५ हजार र रेडक्रस खजुरा शाखा अध्यक्ष जिवनाथ सापकोटाबाट १० हजार ५०० गरि कुल २ लाख २० हजार ५०० को लागतमा सालिक निर्माण भएको खजुरा गाउँपालिकाका प्रमुख प्रशासकीय अधिकृत दीलबहादुर पौडेलले जानकारी दिए ।
आजै बाँकेको नेपालगन्जमा पूर्व प्रधानमन्त्री विपी कोईराला र सुशील कोइराला, नेकपाका संस्थापक महासचिव पुष्पलाल श्रेष्ठ, जनआन्दोलनकी सहिद सेतु विक तथा पूर्व राजा विरेन्द्रको सालिक अनावरण गरिएको छ ।
प्रतिक्रिया