पाकिस्तानका प्रधानमन्त्री इमरान खानले जम्मु काश्मिरको विवादलाई अन्तराष्ट्रिय वैधताको आधारमा समाधान गरिनुपर्ने बताएका छन् ।
संयुक्त राष्ट्रसंघको ७५औं महासभालाई सम्बोधन गर्दै प्रधानमन्त्री खानलले जम्मु काश्मिरको विवादलाई अन्तराष्ट्रिय वैधताका आधारमा हल नगरेसम्म दक्षिण एशियामा शान्ति र स्थायित्व नआउने चेतावनी दिएका छन् ।
प्रधानमन्त्री खानले भनेका छन्, सुरक्षा परिषद्ले यस खतरनाक विवादलाई रोक्नुपर्छ र आफ्नो पहिलेको प्रस्तावलाई लागु गर्नु पर्छ जसरी पूर्वी टिमोरमा गरिएको थियो ।’
प्रधानमन्त्री खानलले आफ्नो सम्बोधनमा जम्मु काश्मिर विवाद, अल्पसंख्यकहरुमाथि गरिएको व्यवहार र आरएसएसको हिन्दुत्ववादी एजेण्डालाई लिएर भारतमाथि कडा प्रहार गरेका छन् ।
खानले भारतमाथि काश्मिरमा मानवअधिकार हनन एवं सेनाको प्रयोगलाई लिएर आरोप समेत लगाएका छन् ।
उनले भनेका छन्, म यो स्पष्ट पार्न चाहन्छु कि फासीवादी, अधिनायकवादी, आरएसएस नेतृत्वको सररकाले यदि पाकिस्तान विरुद्ध आक्रमण गर्ने कोशिस गर्यो भने त्यसका विरुद्ध अन्तसम्म लड्न पाकिस्तान तयार रहनेछ । भारतको यस्तो राष्ट्रसँग प्रत्यक्ष मुठभेड हुनेछ जसले आफ्नो स्वतन्त्रताका लागि अन्तसम्म लडाईं जारी राख्नेछ ।’
प्रधानमन्त्री खानले आरएसएसलाई जर्मन नाजीसँग तुलना गरेका छन् । आरएसएसका संस्थापक सदस्य नाजीबाट प्रभावित भएको र उनीहरुमा नस्लीय शुद्धता एवं वर्चस्व जस्तो अवधारणा रहेको जिकिर गरेका छन् ।
‘नाजीहरुले यहुदीलाई घृणा गर्दथे । आरएसएसले मुसलमान एवं केही हदसम्म इसाईविरुद्ध नाजीले जस्तै व्यवहार गर्दछ । आरएसएसवालाले भारतलाई खाली हिन्दुको मात्र देश भएको मान्छन् र गान्धी एवं नेहरुको धर्मनिरपेक्षताको स्थानमा हिन्दु राष्ट्र बनाउने सपना देखेका छन्, खानले भनेका छन् । उनले आफ्नो भाषणमा सन् २००२ को गुजरात दंगाको पनि प्रसंग उठाएका थिए ।
खानले पाकिस्तानले नियन्त्रण रेखामा भारतको उक्साहटपूर्ण कारवाहीका वावजुद अधिकतम संयम देखाएको दाबी गर्दै सबै समस्याको सधैं शान्तिपूर्ण समाधानका लागि तयार रहेको बताए ।
इमरान खानले जम्मु काश्मिरमा धारा ३७० हटाउने कुराको फेरि पनि आलोचना गरेका छन् । भारत सरकारले राज्यमा अहिलेसम्म बसोबास रहेको जनसांख्यिक यथास्थितिमा बदलाव ल्याउने कोशिस गरिरहेको आरोप समेत लगाएका छन् । जसका कारण, भारतले संयुक्त राष्ट्र संघको सुरक्षा परिषद्को प्रस्तावमा उल्लेखित जनमत संग्रह प्रभावित पार्न खोजेको खानको आरोप छ ।
खानले गत वर्ष उठाएको विकासशील देशमा अवैध वित्तीय प्रवाह, जलवायु परिवर्तन एवं विश्व स्तरमा देखिएको इस्लामोफोवियाको विषयमा पनि गम्भीर प्रश्न उठाएका छन् ।
प्रधानमन्त्री खानले विश्वव्यापी फैलिएको कोरोना भाइरसको महामारीले पाकिस्तानलाई पनि प्रभावित पारेको भन्दै त्यसविरुद्ध लड्नका लागि सबै मिल्नुपर्ने जनाए । महामारीबाट जोगिन पाकिस्तानमा कडा लकडाउन लगाएको भन्दै खानले महामारीलाई आफ्नो देशमा कम गर्न सफल भएको समेत जिकिर गरे । एजेन्सी
प्रतिक्रिया