काठमाडौं । काठमाडौं उपत्यकामा कोरोना भाइरसका संक्रमित शनिबार पनि १ हजार भन्दा बढी थपिएका छन् ।
स्वास्थ्य तथा जनसंख्या मन्त्रालयले आयोजना गर्ने नियमित पत्रकार सम्मेलनमा प्रवक्ता प्राडा जागेश्वर गौतमले दिएको जानकारी अनुसार उपत्यकामा शनिबार ११ सय ७७ जना संक्रमित थपिएका छन् ।
जसमध्ये सबैभन्दा धेरै काठमाडौंमै रहेका छन् । काठमाडौंमा १ हजार १ जना, ललितपुरमा १०९ जना र भक्तपुरमा ६७ जना संक्रमित थपिएको प्रवक्ता गौतमले जानकारी दिए ।
गौतमले घना वस्ती भएको काठमाडौंमा संक्रमण दर उच्च रहेको भन्दै काठमाडौं बाहिरका मानिसहरुलाई सकेसम्म काठमाडौं नआउन आग्रह गरेका छन् । अत्याधिक भीडभाडका कारण काठमाडौं लगायतका शहरहरुमा संक्रमण बढेको उनले जिकिर गरे ।
काठमाडौं आउनै परे जनस्वास्थ्यको मापदण्डलाई अनिवार्य पालना गर्न पनि उनले अनुरोध गरेका छन् ।
प्रतिक्रिया