बुटवल । नेपाल कम्युनिष्ट पार्टी नेकपाको रुपन्देही जिल्ला समितिले घुमाउरो पारामा बुटवलमा जारी नागरिक आन्दोलनलाई समर्थन गरेको छ ।
प्रदेश सरकारले प्रस्ताव गरेको राजधानी बुटवलबाट दाङ सार्ने विषयमा आईतबार विज्ञप्ति प्रकाशित गर्दै नेकपाले राजधानी एकाएक सार्ने प्रदेश सरकारको निर्णयबाट रुपन्देही र यस आसपासका जनताहरु आन्दोलित हुनुलाई स्वाभाविक भनेको छ ।
नेकपा रुपन्देहीका अध्यक्ष शिवराज सुवेदी र नारायण जीसीले हस्ताक्षर गरेको विज्ञप्तिमा प्रदेश सरकारले स्थायी राजधानी प्रस्ताव गर्दा संविधानको भावनालाई कदर गर्न नसकेको आरोप लगाएको छ । संविधानले राजधानी तोक्दा प्रशासनिक, भुगोल र भौतिक पुर्वाधारलाई आधार मान्न भने पनि प्रदेश सरकारले त्यसको आत्मसात नगरेको विज्ञप्तिमा उल्लेख छ ।
विज्ञप्तिमा सांसदहरुलाई निर्वाचनमा गरेको बाचालाई स्मरण गरेर मात्र मत दिन आग्रह गर्दै सोहि अनुसार सांसदहरुले मतदान गर्ने नेकपाले विश्वास लिएको उल्लेख गरिएको छ ।
अस्थायी मुकामलाई नै स्थायी राजधानी तोक्ने गरि सिफारिस सच्याउन नेकपा रुपन्देहीले प्रदेश सरकारसँग माग समेत गरेको छ ।
प्रतिक्रिया