काठमाडौं । काठमाडौं उपत्यकामा कोरोना संक्रमितको संख्या दिनपछि दिन बढिरहेको छ ।
काठमाडौंमा १ हप्तामै १० हजार बढी संक्रमित थपिएको स्वास्थ तथा जनसंख्या मन्त्रालयले जनाएको छ ।
बिहीबार उपत्यकामा अहिलेसम्मकै सबैभन्दा धेरै संक्रमित थपिएका छन् । २ हजार ५४० जना संक्रमित थपिएको स्वास्थ्य तथा जनसंख्या मन्त्रालयका प्रवक्ता प्राडा जागेश्वार गौतमले जानकारी दिए ।
उपत्यकामा सबैभन्दा धेरै काठमाडौं जिल्लामै थपिने गरेका छन् । काठमाडौंमा बिहीबार २ हजार ८५ जना नयाँ संक्रमित थपिएका छन् ।
यसैगरी ललितपुरमा ३२० जना जना र भक्तपुरमा १३५ जना संक्रमित थपिएका छन् ।
सबैभन्दा धेरै जनघनत्व भएको काठमाडौंमा संक्रमितहरु बढेसँगै काठमाडौंका अस्पतालहरुलाई उपचारका लागि चाप समेत बढेको छ । स्वास्थ्य तथा जनसंख्या मन्त्रालयले अस्पतालका बेड, आइसोलेसन भरिँदै गएको भन्दै सकेसम्म होम आइसोलेसनमै बस्न अनुरोध गरेको छ ।
स्वास्थ्य मन्त्रालयले दशैंको समयमा किनमेलका लागि बाहिर निस्कँदा विशेष ध्यान पुर्याउन, मन्दिर एवं धार्मिक स्थलहरुमा पूजारीले मात्रै पूजा गर्ने व्यवस्था मिलाउन समेत अनुरोध गरेको छ ।
तर, सरकारले जनस्वास्थ्यका मापदण्डलाई पालना गर्दै संक्रमण नबढाउन नागरिकलाई अपिल गरिरहे पनि त्यसको अटेर हुँदा संक्रमण बढिरहेको छ ।
प्रतिक्रिया