काठमाडौं । प्राध्यापक डाक्टर गोविन्द केसीले २८ दिनपछि आमरण अनसन तोडेका छन् ।
सरकारसँग गएराति ८ बुँदे सहमति भएपछि डा. केसीले आइतबार बिहान आफ्नो १९ औं आमरण अनसन अन्त्य गरेका हुन् ।
डा. केसीले अस्पतालका कर्मचारी विकास नेपालीको हातबाट जुस खाएर अनसन तोडेका छन् ।
केसीले अनशन तोडनुअघि प्रधामन्त्री केपी शर्मा ओली, सरकारी वार्ता टोली, शुभचिन्तक तथा सहयोगीलाई धन्यवाद दिए ।
त्यसअघि डा. केसीका सहयोगी प्रितम सुवेदीले सरकारसँग भएको ८ बुँदे सहमति पत्र पढेर सुनाएका थिए ।
चिकित्सा क्षेत्रको सेवा र शिक्षाको सुधार एवं समसामयिक जनचासोका मागसहित अनसनमा रहेका केसीका माग पुरा गर्न शनिबार मध्यरातमा सरकार सहमत भएको थियो ।
केसीले गत भदौ २९ गते कर्णाली प्रदेशको जुम्लाबाट अनसन सुरु गरेका थिए । उनी आठौं दिनको दिनमा नेपालगन्ज हुँदै काठमाडौं आएर त्रिवि शिक्षण अस्पतालमा अनसन बसेका थिए ।
डा. केसीको जीवन रक्षाको माग राख्दै वार्ताबाट समस्याको समाधान खोज्न नेपाल चिकित्सक संघ, रेसिडेन्ट डाक्टर एशोसिएसन लगायत पेशागत संगठनहरुसहित विभिन्न राजनीतिक दलले दबाब दिएका थिए ।
प्रतिक्रिया