विहार चुनाव मतगणना : ३२ वर्षीय तेजस्वी यादवको तेजस्वी रफ्तार

काठमाडौं । भारतको बिहारको विधानसभा निर्वाचनका लागि भएको चुनावको मतगणना सुरु भएको छ ।

नेपालसँग सीमा जोडिएको भारतको बिहारमा भैरहेको मतगणनामा युवा नेता तेजस्वी यादव नेतृत्वको महागठबन्धन अघि देखिएको छ ।

नेपाली समयअनुसार बिहान ८ः१५ बजेबाट मतगणना सुरु भएको छ । सुरुवाती रुझानले सत्तारुढ एनडीए गठबन्धनलाई पछि पार्दै तेजस्वीको महागठबन्धन अघि देखाएको छ ।

मतगणनाको नतिजा यसैअनुसार अघि बढे १५ वर्षसम्म सत्ता सम्हालेका नितिश कुमार र भारतीय जनता पार्टी बीजेपीको एनडीएलाई यसपटक बिहारका जनताले विपक्षमा पुर्याइदिनेछन् ।

पूर्वमुख्यमन्त्री लालु यादवका ३२ वर्षीय छोरा तेजस्वी यादव नेतृत्वको महागठबन्धनमा भारतीय राष्ट्रिय काँग्रेस, वामपन्थी दलहरु र अन्य साना पार्टी रहेका छन् ।

सन् २०१५ को निर्वाचनमा तेजस्वी र नितिश कुमार बीजेपी विरुद्ध महागठबन्धन बनाएर निर्वाचनमा विजयी भएपनि पछि नितिशले आफ्नो पूर्व गठबन्धन समुह एनडीएमै प्रवेश गरेर तेजस्वीलाई सरकारबाट हटाएका थिए ।

कोरोना भाइरसको महामारीका बीच भएको विहारको निर्वाचनमा मतदाताले बीजेपीको उग्रराष्ट्रवाद र नितिश कुमारको सत्तासञ्चालन प्रवृत्तिलाई अस्वीकार गरे जस्तो देखिएको छ ।