नेपाल-भारत परराष्ट्र सचिवस्तरीय वार्ता सम्पन्न

काठमाडौं । लामो समयदेखि हुननसकेको नेपाल भारत परराष्ट्रसचिव स्तरीय वार्ता सम्पन्न भएको छ ।

काठमाडौंको होटल याक एण्ड यतिमा भएको वार्ताले दुई मुलुकबीच कुटनीतिक संवादको बाटो समेत खुला गरेको छ । वार्ताको नेतृत्व नेपालको तर्फबाट परराष्ट्रसचिव भरतराज पौडेलले र भारतको तर्फबाट विदेशसचिव हर्षवर्धन श्रृंगलाले गरेका थिए ।

वार्ताबारे परराष्ट्र मन्त्रालयले औपचारिक जानकारी गराइसकेको छैन । तर भारतले भने दुईपक्षीय वार्ता निकै उपलब्धीमुलक भएको जनाएको छ । भारतीय राजदूतावासले चलाउने ट्वीटर ह्यान्डल ‘इन्डियाइननेपाल’ मा वार्तामा द्धीपक्षीय सहयोगको समीक्षा गरिएको जनाइएको छ । वार्तामा आपसी हितका मुद्दाहरुमा छलफल गरेको पनि जनाएको छ ।

आजै बिहान मात्रै काठमाडौं ओर्लिएका श्रृंगला दुईपक्षीय वार्ता सकिएलगत्तै परराष्ट्रमन्त्री प्रदीप ज्ञवालीलाई भेट गर्न सिंहदरबार पुगेका छन् । त्यसपपछि उनले आजै प्रधानमन्त्री केपी शर्मा ओली र राष्ट्रपति विद्यादेवी भण्डारीसँग पनि शिष्टाचार भेटवार्ता गर्ने कार्यक्रम रहेको छ ।