कोरोना संक्रमणबाट लमजुङमा एक वृद्धको मृत्यु

लमजुङ । लमजुङमा कोरोना संक्रमणका कारण एक वृद्धको मृत्यु भएको छ । बेंसीसहर नगरपालिका वडा नंबर ९ का ९७ वर्षीय वृद्धको बिहीबार साँझ मृत्यु भएको हो ।

कोरोना संक्रमण पुष्टि भएपछि होम आइसोलेसनमा रहेका वृद्धको स्वास्थ्यमा थप समस्या भएपछि उपचारका लागि बेंसीसहरस्थित जिल्ला अस्पताल ल्याइएको थियो ।

उनको अस्पतालमा उपचारको क्रममा मृत्यु भएको अस्पतालका प्रमुख हेमन्त श्रेष्ठले जानकारी दिए ।

श्रेष्ठका अनुसार परिवारका सबै जनामा कोरोना संक्रमण देखिएपछि वृद्धको सोमबार स्वाब लिएर पिसिआर परीक्षणका लागि पोखरा पठाइएको थियो । वृद्धमा बुधबार कोरोना पुष्टि भएको थियो ।

यसअघि लमजुङका नागरिकको बाहिरी जिल्लामा उपचारका क्रममा पाँच जनाको मृत्यु भइसकेको छ । कोरोना संक्रमितको जिल्लामै मृत्यु भएको यो पहिलो घटना हो ।