काठमाडौं । विश्वकै सर्वोच्च शिखर सगरमाथाको उचाई बढेको छ ।
हालसम्म रहेको सगरमाथाको उचाई ०.८६ मिटर बढेको हो । नेपाल र चीनले मंगलबार संयुक्त घोषणा गर्दै सगरमाथाको उचाई ०.८६ मिटर बढेको घोषणा गरेका हुन् ।
काठमाडौं र बेइजिङबाट संयुक्त रुपमा आयोजना गरिएको भर्चुअल कार्यक्रममा परराष्ट्रमन्त्री प्रदीपकुमार ज्ञवालीले सगरमाथाको उचाईको घोषणा गरेका हुन् । चिनियाँ विदेशमन्त्री वाङ यीले मन्त्री ज्ञवालीको सम्बोधन लगत्तै सगरमाथाको सोही उचाईलाई चीनको तर्फबाट घोषणा गरेका छन् ।
नापी विभागमा भूमि सुधार मन्त्रालयका टोलीसहित परराष्ट्र मन्त्री प्रदीपकुमार ज्ञवाली, भूमी व्यवस्थामन्त्री पद्माकुमारी अर्याल लगायतका सरकारी अधिकारीहरुको उपस्थिति रहेको थियो ।
नेपाल र चीनका फिल्ड सर्वेक्षकहरुले सगरमाथाको अलगअलग सर्वेक्षण गरेका थिए । नेपालले पहिलो पटक आफ्नै स्रोतसाधनले सगरमाथाको उचाइ मापन गरेको हो । नेपालले करीब दुई वर्ष लगाएर उचाइ मापन गरेको थियो । पछि चिनियाँ प्राविधिकहरुसँग संयुक्त छलफल भएपछि निकालिएको सगरमाथाको उचाईलाई दुवै देशको सरकारले स्वीकृत गरेका थिए ।
गत मंसिर १० गते बसेको मन्त्रिपरिषद् बैठकले सगरमाथाको उचाई सार्वजनिक गर्न स्वीकृति दिएको थियो ।
चीनमा चोमोलोङमा र बाँकी विश्वले माउन्ट एभरेष्ट भनेर चिन्ने सगरमाथाको पहिलो उचाई भारतले सन् १९५५ मा मापन गरेको थियो । सोही आधारमा अहिलेसम्म ८ हजार ८४८ मिटरलाई सगरमाथाको उचाई मानिँदै आएको छ ।
प्रतिक्रिया