काठमाडौं । सर्वोच्च अदालतले सभामुख अग्नि सापकोटाको मुद्दाको पेशी तोकेको छ ।
प्रधानन्यायाधीश चालेन्द्रशम्शेर जबरा, दीपककुमार कार्की, मीरा खड्का, हरिकृष्ण कार्की र विश्वम्भरप्रसाद श्रेष्ठको संवैधानिक इजलासमा परेको सभामुख सापकोटाको मुद्दाको पेसी शुक्रबार तोकिएको हो ।
यसअघि सभामुख सापकोटाको मुद्दा २०७६ फागुनमा पेशीमा चढाइएको थियो । तर नभ्याएपछि सुनुवाई सरेको थियो ।
सभामुख सापकोटालाई काभ्रेका अर्जुन लामाको हत्याको आरोप रहेको छ । सापकोटाको हात रहेको भन्दै उनकी पत्नी पूर्णिमाया लामाले ७ मंसिर २०६९ मा मुद्दा हालेकी थिइन् ।
सत्तारुढ नेपाल कम्युनिष्ट पार्टीभित्र देखिएको तिब्र अन्तसंघर्षकै बीचमा सभामुख सापकोटाको मुद्दामा पेशी तोकिनुलाई अर्थपूर्ण मानिएको छ ।
प्रधानमन्त्री केपी शर्मा ओलीले बोलाएको संवैधानिक परिषदको बैठकमा सभामुख सापकोटा तीन पटक अनुपस्थित भएका थिए । सभामुख सापकोटा नेकपा अध्यक्ष प्रचण्ड निकट रहेका छन् ।
प्रतिक्रिया