काठमाडौं । नेपाल कम्युनिष्ट पार्टी (नेकपा)का उपाध्यक्ष वामदेव गौतमले पार्टी फुटको साक्षी बस्न कुनै पनि गुट भेलामा नजाने स्पष्ट पारेका छन् ।
आफ्ना प्रेस सहयोगी विश्वमणी सुवेदीमार्फत आफ्ना धारणा सार्वजनिक गर्दै गौतमले पार्टी अब फुटको घोषणा गर्नमात्रै बाँकी रहेका बैठक र भेलामा भाग नलिने निर्णय गरेको स्पष्ट पारेका हुन् ।
गौतमले आफु फेरि पनि पार्टी एकताको पक्षमा रहेको जनाउँदै त्यसका निम्ति अर्को निर्णय नहुँदासम्म पार्टी एकीकरण बचाउने प्रयासमा रहने जनाएका छन् ।
उनले भनेका छन्, ‘क.केपी ओलीले गरेको भेला होस् वा अरु कमरेडहरुले गर्नुभएको भेला नै किन नहोस् – ती सबै पार्टी फुटाउनका निम्ति भइरहेका छन् । म फुटको साक्षी बस्न सक्दिनँ । म यो पार्टी एकीकरण गराउने मध्येको नेता हुँ । त्यसैले अहिले पनि एकताको पक्षमा म छु । संसद भंगको गैरसंवैधानिक कदमको विरोध गरिरहन्छु । तर, दुबैतिरका भेलामा मेरो उपस्थिति हुँदैन । मैले पहिले पनि गुटहरुको भेलामा नजाने भन्दै आएको हुँ ।’
उपाध्यक्ष गौतमले राष्ट्रपतिले संविधानको मर्म र भावना विपरित संसद विघटन गरेको विरोधमा आफुले हिजै धारणा सार्वजनिक गरेको जनाएका छन् ।
उनले भनेका छन्, ‘मन्त्रिपरिषद्ले संसद भंग र मध्यवधी निर्वाचनको सिफारिस गरेपछि मैले सम्माननीय राष्ट्रपतिलाई टेलिफोनबाटै त्यस्तो सिफारिस स्वीकृत नगर्नुस् भन्न चाहेको थिएँ । तर, उहाँसँग टेलिफोनमा कुरा गर्न सम्भव भएन ।
त्यसपछि मैले उहाँका प्रमुख स्वकीय सचिव भेषराज अधिकारीमार्फत भनेको थिएँ, ‘यदि उहाँले मन्त्रिपरिषद्को सिफारिस बमोजिमको विषयलाई जारी गर्नुभयो भने त्यो दुर्भाग्यपूर्ण हुनेछ । उहाँले यसलाई एकपटक मन्त्रिपरिषदमै फर्काइदिन उपयुक्त हुन्छ । यसका निम्ति मेरो विनम्र अनुरोध छ ।
तर, राष्ट्रपतिले विज्ञप्तिमार्फत मन्त्रिपरिषद्को सिफारिसलाई स्वीकृत गर्नुभएको समाचार सुनेँ । त्यसपछि त्यो दुःखद् घटना हो भन्ने निश्कर्षमा पुगेँ । त्यसपछि संविधानको मर्म र भावना विपरित प्रतिनिधिसभा विघटन गैर संवैधानिक कदम हो भन्ने धारणासहित मैले आइतबार नै विज्ञप्ति जारी गरेँ ।’
प्रतिक्रिया