काठमाडौं । नेकपाको प्रचण्ड नेपाल पक्षको स्थायी कमिटीको बैठक पेरिसडाँडामा सुरु भएको छ । आइतबार प्रचण्डको अध्यक्षतामा सुरु भएको बैठकलाई निरन्तरता दिंदै आज बसेको बैठकको अध्यक्षता भने अर्का अध्यक्ष माधवकुमार नेपालले गरेका छन् ।
अध्यक्ष प्रचण्ड पत्नी सीता दाहालको उपचारका लागि मुम्बई प्रस्थान गरेपछि नेपालको अध्यक्षतामा बैठक बसेको हो । प्रचण्ड-नेपाल पक्षको पुस ९ मा सम्पन्न स्थायी कमिटी बैठकले बैठकको अध्यक्षता प्रचण्ड र माधव नेपाल आलोपालो गर्ने गरि निर्णय गरेको थियो ।
आजको बैठकले संसद विघटनका बिरुद्ध तय गरिएको संघर्षको कार्यक्रमबारे छलफल गर्ने तथा पार्टी र जनवर्गीय संगठनको जिम्मेवारी बाँडफाँटबारे छलफल हुने कार्यसूची बनाएको बताईएको छ । पार्टी एकिकरणको बाँकी कामलाई सम्पन्न गर्न र जनवर्गिय संगठनको जिम्मेवारीको मापदण्ड तय गर्न यस अघि नै अध्यक्ष माधव नेपालको संयोजकत्वमा कार्यदल बनिसकेको छ ।
कार्यदलले पाँच दिनभित्र मापदण्ड सिफारिस गर्नेछ ।
प्रतिक्रिया