काठमाडौं । नेपाल बार र सर्वोच्च बार एसोसिएसनले प्रतिनिधिसभा विघटन विरुद्धको रिटमा संवैधानिक इजलासलाई सघाउने गरी एमिकस क्युरी गठन गरेर पठाएको छ ।
नेपाल बार र सर्वोच्च बारले संसद विघटनविरुद्धको रिटमा सर्वोच्च अदालतको संवैधानिक इजलासलाई सघाउनका लागि मागिएको एमिकस क्युरीको सदस्यहरु छनौट गरि पठाएको हो ।
प्रस्तुत रिटको बाँकी सुनुवाइका लागि अदालतले एमिकस क्युरी माग्ने निर्णय गरेको थियो ।
अदालतमा जारी बहसमा फैसला गर्नका लागि सघाउने गरी अदालतले माग्ने विशिष्ट कानुनका ज्ञाताहरुलाई एमिकस क्युरी अर्थात अदालतका साथीको रुपमा सहयोग लिने कानुनी अभ्यास रहँदै आएको छ ।
सर्वोच्चले संवैधानिक इजलासमा मुद्दाको पहिलो सुनुवाइ गर्दै एमिकस क्युरी माग्ने आदेश दिएको थियो । इजलासको माग बमोजिम नेपाल बार एसोसिएसनबाट ३ जना र सार्वेच्च बार एसोसिएसनबाट २ जना गरी ५ जनाको एमिकस क्युरी गठन गरिएको हो ।
नेपाल बारका अनुसार नेपाल बारबाट वरिष्ठ अधिवक्ता बद्री बहादुर कार्की, सतिशकृष्ण खरेल र विजयकान्त मैनाली र सर्वोच्च बारबाट वरिष्ठ अधिवक्ता पूर्णमान शाक्य र गीता पाठकको नाम एमिकस क्युरीमा सिफारिस भएको छ । सिफारिसमा परेका ५ जनाले उक्त मुद्दामा अदालतलाई सघाउनेछन् ।
सर्वोच्चले संसद विघटनसम्बन्धी मुद्दामा भोलिदेखि निरन्तर सुनुवाइ हुनेगरी यसअघिनै निर्णय गरिसकेको छ ।
यसबीचमा राष्ट्रपति, प्रधानमन्त्री र सभामुखबाट अदालतले सोधेको कारण देखाउ आदेशको जवाफ दिइसकेका छन् ।
प्रतिक्रिया