काठमाडौं । प्रतिनिधिसभा विघटन मुद्दाबारे सर्वोच्च अदालतको संवैधानिक इजलासमा सोमबारको सुनुवाइ सकिएको छ ।
मंगलबार पुनः सुनुवाइ हुनेगरी आजको सुनुवाइ स्थगित भएको छ । आज अधिवक्ता दीनमणी पोखरेले लामो बहस गर्दै सरकारले संविधानको धारहरुको अपव्याख्या गरेको तर्क गरे । पोखरेलले संसद विघटन गर्न पाउने प्रधानमन्त्रीको अधिकार नभएको भन्दै अन्तराष्ट्रिय नजिर पनि पेश गरे ।
पोखरेलले संविधानसभाका अध्यक्ष सुवासचन्द्र नेम्वाङले प्रधानमन्त्रीलाई संसद विघटन गर्न पाउने अधिकार नभएको विषयमा दिएको भिडियोलाई समेत इलजासमा प्रवेश गराए ।
लामो बहस गरेका पोखरेललाई बहस टुंग्याउन, समयको ख्याल गर्न र अन्य वकिलहरुलाई पनि बहसमा भाग लिन दिन इजलासले सम्झाएको थियो । पोखरेलले मात्रै ३ घण्टा बढी समय लिएपछि इजलासले समयको पावन्दीलाई सुझाव दिएको थियो ।
प्रधानन्यायाधीश चोलेन्द्रशमशेर राणाको नेतृत्वमा विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसी सम्मिलित संवैधानिक इजलासमा सुनुवाइ भइरहेको छ। सुनुवाइ भोलि मंगलबार पनि जारी रहनेछ ।
प्रतिक्रिया