संयुक्त राज्य अमेरिकाका विवादास्पद एवं सन्काहा राष्ट्रपति डोनाल्ड ट्रम्पको कार्यकाल सकिन अब केही घण्टा मात्रै बाँकी छ ।
राष्ट्रपतिमा निर्वाचित डेमोक्र्याट जो बाइडेनको सपथ ग्रहण समारोहसँगै ट्रम्प राष्ट्रपतिबाट औपचारिक रुपमा बाहिरिँदै छन् । तर, त्यसअघि नै ट्रम्पलाई अधिकांश अमेरिकनले राष्ट्रपतिबाट हटाइसकेका छन् ।
आफ्नो स्वभावका कारण राष्ट्रपतिमा निर्वाचित भएसँगै पूर्वार्धबाटै विवादित बनेका ट्रम्प कार्यकालको उत्तरार्धमा आइपुग्दा नराम्रोसँग आलोचित भएका छन् । राष्ट्रपतिमा निर्वाचित हुनका लागि राज्यशक्तिको दुरुपयोग गर्दै अनेकौं अथकण्डा अपानाएका ट्रम्पको उक्साहटमा जनवरी ६ मा अमेरिकी संसद गरिएको आक्रमणपछि उनीविरुद्ध अधिकांश अमेरिकीहरुले घृणा गर्न थालेका थिए । अमेरिकी मात्र नभएर विदेशी मित्रराष्ट्रहरु समेत ट्रम्पसँग तर्किएका थिए । सोही कारण विदेशमन्त्री माइक पोम्पियोले समेत अन्तिम समयमा तय गरेको विदेश भ्रमण समेत अकस्मात स्थगित गर्न बाध्य बने ।
त्यसो त, कुनै पनि निवर्तमान राष्ट्रपति नयाँ राष्ट्रपतिको सपथ ग्रहण समारोहमा उपस्थित हुने अमेरिकी प्रचलन रहेको छ । तर, ट्रम्पले राष्ट्रपति जो बाइडेनको सपथ ग्रहण समारोहलाई बहिस्कार गर्ने घोषणा गरेर आफ्नो चरित्र देखाइसकेका छन् । ट्रम्प राष्ट्रपति निवास ह्वाइट हाउसबाट बाहिरिँदै छन् । तर, उनलाई अन्तिम विदाई गर्न उनकै उपराष्ट्रपति माइक पेन्स नजाने भएका छन् । माइक पेन्स बाइडेनको सपथ ग्रहणमा उपस्थित हुने भएका छन् ।
उपराष्ट्रपतिका रुपमा ट्रम्पसँग अन्तिम घण्टा बिताइरहँदा पेन्सले उपराष्ट्रपतिका रुपमा ४ बर्ष सेवा गर्न पाएकोमा धन्यवाद व्यक्त गरेका छन् । उनले भनेका छन् ‘विगत चार बर्ष तपाईको उप राष्ट्रपतिको रूपमा सेवा गर्ने सुअवसरको लागि धन्यवाद । यो मेरो जीवनको सबैभन्दा ठूलो सम्मान हो। दोस्रो महिला, क्यारेन पेन्स र हाम्रो सम्पूर्ण परिवारको तर्फबाट धन्यवाद । भगवानले अमेरिकालाई आशिर्वाद दिउन् ।’
अहंकार र घमण्डले गर्दा सपथ ग्रहण समारोहमा सरिक हुन नचाहेका ट्रम्प ह्वाइट हाउसबाट विदा भएर फ्लोरिडा जाँदैछन् । ट्रम्पले सपथग्रहण हुनुभन्दा केही घण्टा अगाडि नै ह्वाइटहाउस छाड्ने जनाइएको छ । ट्रम्पले अमेरिकी समयअनुसार बुधबार बिहान ८ बजे ह्वाइट हाउस छाडेर संयुक्त एन्ड्रयु बेसतर्फ लाग्ने बताइएको छ ।
तर ट्रम्पको बिदाईमा उपराष्ट्रपति पेन्स मात्र नभई अरु कैयन बरिष्ठ रिपब्लिकन नेताहरु पनि नजाने बताइएको छ । सिनेटमा रिपब्लिकन नेता मिच म्याक्कोनेल र हाउसमा रिपब्लिकन नेता केभिन म्याकार्थी पनि बिदाईमा नजाने भएका छन् ।
उता, अमेरिकी संसदभवन क्यापिटल हिलको पश्चिमतिरको अग्रभागमा राष्ट्रपति जो बाइडेनको सपथग्रहण समारोहको आयोजना गरिने भएको छ । ट्रम्पका हिंस्रक समर्थकहरुले आक्रमण गरेपछि संसद भवनआसपासको क्षेत्रलाई छाउनीमा बदएिको छ । २० हजार भन्दा बढी सुरक्षाकर्मीको पहरामा जो बाइडेनले केही घण्टापछि ४६औं राष्ट्रपतिको सपथ ग्रहण गर्नेछन् । त्यससँगै उनको प्रशासनले अमेरिकाको नेतृत्व गर्नेछ ।
ट्रम्पकै व्यवहारका कारण उनीमाथि अमेरिकी इतिहासमै पहिलो पटक बहालवाला राष्ट्रपतिमाथि दुई पटक महाअभियोग प्रस्ताव संसदको तल्लो सदनबाट पारित भयो । आफ्नो व्यवहारकै कारण सबै मित्रहरुलाई चिढ्याएका सन्काहा राष्ट्रपति ट्रम्पको बहिर्गमन भने अमेरिकी इतिहासमा तितो इतिहास बनेर सकिएको छ । यौटा सन्काहा राष्ट्रपतिको अस्वभाविक बर्हिगमन भएको छ ।
प्रतिक्रिया