काठमाडौं । बागमती प्रदेशसभामा पेश भएको मुख्यमन्त्रीका विरुद्ध दर्ता भएको अविश्वासको प्रस्तावमा मत विभाजन प्रक्रियाबारे सत्तारुढ दल नेकपाका प्रचण्ड–नेपाल र केपी ओली पक्षबीच विवाद भएको छ ।
अविश्वासको प्रस्ताव टुंगो लगाउन र मत विभाजन प्रक्रियालाई सहज बनाउन बनाईएको कार्यविधि मस्यौदा समिति भित्रै कार्यविधिका बिषयमा विबाद भएको हो ।
ओली पक्षका सांसदहरू गणेश दुलाल, केशवराज पाण्डे, प्रचण्ड–नपाल पक्षका सांसदहरू राजेन्द्र पाण्डे, कञ्चन खनाल र बुद्धिमान माझीबीच मत विभाजनको प्रक्रियाबारे विवाद भएको हो
बैठकमा सहभागी एक सांसदका अनुसार ओली पक्षका सांसदहरूले अविश्वासको प्रस्ताव निर्माण र मतविभाजनको प्रक्रियालाई लिएर बैठक लम्ब्याउन खोजेका छन् भने प्रचण्ड–नेपाल पक्षले तत्काल कार्यविधि टुंग्याउन जरुरी रहेकोतर्फ जोड दिइरहेका छन् । दुई समूहबीच कार्यविधि निर्माण र प्रक्रियाबारे फरक मत भएपछि विवाद सिर्जना भएको हो ।
नौ सदस्यीय कार्यविधि मस्यौदा समितिको बैठकले नेपाली कांग्रेसका सचेतक छिरिङदोर्जे लामालाई संयोजक तोकेको छ । लामाले मस्यौदा निर्माण अन्तिम चरणमा पुगेको भए पनि कार्यव्यवस्था समितिमा थप छलफल गर्न बाँकी रहेको जानकारी दिए । लामाका अनुसार कार्यव्यवस्था समितिमा संसदीय दलका नेताहरूसँग छलफल गरेर मात्र अविश्वासको प्रस्ताव उपरहुने कारवाही सहितको मत विभाजनको अन्तिम मस्यौदा सभामुखलाई हस्तान्तरण गरिनेछ ।
आगामी प्रदेश सभाको बैठकअघि कार्यव्यवस्था परामर्श समितिमा मस्यौदा छलफलका लागि उपलब्ध गराइने कार्यविधि समितिको तयारी छ ।
अविश्वासको प्रस्ताव टुंग्याउने प्रक्रियाअन्तर्गत मत विभाजनलाई सहज बनाउन सभामुख श्रेष्ठकै अगुवाइमा नौ सदस्यीय कार्यविधि मस्यौदा निर्माण समिति गठन गरिएको थियो ।
प्रतिक्रिया