चितवन । प्रधानमन्त्री केपी शर्मा ओलीले चितवनबाट निर्वाचित सांसदहरूले रामको जन्मभूमिमा राम मन्दिर किन बनाउन नसकेको भन्दै प्रश्न उठाएका छन् । गत पुस ५ गतेसम्म एउटै पार्टीमा रहेका चितवनका ३ जना सांसदहरूलाई राम मन्दिर किन बनेन भन्दै प्रधानमन्त्री ओलीले प्रश्न गरेका हुन् ।
शनिबार चितवनमा आयोजित जनसभा कार्यक्रमलाई सम्बोधन गर्दै नेकपा (ओली) समूहका अध्यक्षसमेत रहेका प्रधानमन्त्री ओलीले रामको जन्मभूमिमा आउने वर्ष राम मन्दिर बनाइने बताए ।
उनले रामको मूर्ति बनिसकेको, सिताको मुर्ति बन्दै गरेको उल्लेख गर्दै आगामी वर्ष मन्दिर निर्माण हुने जानकारी दिए ।
२०७४ को आम निर्वाचनमा चितवनबाट निर्वाचित तीनै जना सांसद प्रचण्ड-माधव पक्षमा रहेका छन् । चितवनबाट निर्वाचित सांसदहरु पुष्पकमल दाहाल प्रचण्ड, सुरेन्द्र पाण्डे र कृष्णभक्त पोखरेल सबै ओलीको कदमको विपक्षमा छन् ।
पार्टीको विवादबारे बोल्दै प्रधानमन्त्री ओलीले तीन जना पूर्व प्रधानमन्त्रीहरु प्रचण्ड, माधवकुमार नेपाल र झलनाथ खनाललाई कटाक्ष गर्दै ३ प्रधानमन्त्री लुखुर लुखर सडकमा हिँडिरहेको बताए ।
अर्को प्रसंगमा ओलीले नेकपा विभाजन नभएको र आफू नै आधिकारिक भएको बताए ।
प्रतिक्रिया