सर्लाही । नेपाल कम्युनिष्ट पार्टी प्रचण्ड-नेपाल पक्षका केन्द्रीय सदस्य एवं सर्लाही इन्चार्ज डाचाराज वाग्लेको मोटरसाइकल दुर्घटनामा परेर ज्यान गएको छ ।
बरहथबामा भएको नेकपाको मसाल जुलुस सकेर नयाँरोडतर्फ जाँदै गर्दा नयाँरोड-बरहथवा सडकखण्डको सोल्टिमोड नजिक भएको मोटरसाइकल दुर्घटनामा वाग्लेको मृत्यु भएको सर्लाही प्रहरीले जानकारी दिएको छ ।
बुधबार राति ९ बजेतिर सडकमा लडिरहेको शव र ज १० प ३२०६ नम्बरको मोटरसाइकल देखेपछि स्थानीयले प्रहरीलाई खबर गरेका थिए । हरिपुर नगरपालिका-१ हजारबिघा घर भएका ५१ वर्षका वाग्लेलाई उपचारको लागि बरहथवा प्राथमिक स्वास्थ्य केन्द्र पुर्याउँदा चिकित्सकले मृत घोषित गरेका थिए ।
उनको आँखाको छेउमा सामान्य निलडाम जस्तो देखिए पनि शरीरको अन्य भागमा कुनै चोट नलागेको प्रहरीले जानकारी दिएको छ । घटनाबारे थप अनुसन्धान भइरहेको डीएसपी उद्धवसिंह भाटले जनाएका छन् ।
नेकपाका प्रवक्ता नारायणकाजी श्रेष्ठले भने वाग्लेको मृत्यु रहस्यमय भएको जनाएका छन् । उनले वाग्लेलाई श्रद्धाञ्जलि व्यक्त गर्दै परिवारजनमा समवेदना व्यक्त गरेका छन् ।
प्रतिक्रिया