बैतडी । आफ्नै छोरीमाथी गोली प्रहार गरेर जङ्गल पसेका बैतडी पुर्चौडीका धनबहादुर महराले मध्यराती आएर आफ्नै घर आगो लगाएका छन् । छोरीको हत्या गरेर फरार रहेका ६५ वर्षीय महराले मध्यराती गाउँमा आतंक मच्चाउँदै आफ्नै घर आगो लगाएको प्रहरीले जनाएको छ ।
गोली लोड गरेको भरुवा बन्दुकसहित राती गाँउ फर्केका महराले स्थानीयलाई नजिक आए गोली हान्ने धम्की दिंदै घर पुगेर आगजनी गरेको स्थानीयले बताए ।
लोडेल भरुवा बन्दुक देखाएर गाँउलेलाई धम्काएको खबर पाउनासाथ उनलाई पक्राउ गर्न प्रहरी परिचालन भएपनि पक्राउ गर्न नसकिएको जिल्ला प्रहरी कार्यालय बैतडीका प्रवक्ता प्रहरी निरीक्षक जनकबहादुर धामीले बताए ।
प्रहरी निरीक्षक धामीका अनुसार प्रहरी चौकी पुरघाटबाट १५ जनाको टोली परिचालन गरिनुका साथै थप प्रहरी टोलि पनि सो गाँउमा पठाईएको छ ।
शनिबार साँझ श्रीमतीसँग झगडा हुँदा छुट्याउन क्रममा महराले माइती आएकी २० वर्षीया बेलमती महरा धामीमाथि धनबहादुरले गोली प्रहार गरेका थिए। पिठ्युँमा गोली लागेकी बेलमतीको घटनास्थलमै मृत्यु भएको थियो।
प्रतिक्रिया