काठमाडौं । प्रतिनिधिसभाको अधिवेशन आज अपरान्ह ४ बजेबाट बस्दैछ । अधिवेशन नेपाल कम्युनिष्ट पार्टी नेकपा भित्रको विवादबाट सबैभन्दा बढी प्रभावित हुने देखिएको छ ।
नेकपाको विभाजनले कानुनी मान्यता नपाएका कारण संसदभित्र प्रचण्ड-नेपाल पक्ष र ओली पक्षले लिने रणनीतिले अधिवेशनको अवस्था आंकलन गर्न सकिन्छ ।
ओली पक्षले प्रचण्ड नेपाल पक्षलाई कुनै मान्यता नदिन संसद सचिवालयलाई दबाब दिएको छ । प्रचण्ड-नेपाल पक्षले पनि ओली पक्षलाई पार्टी र संसदीय दलबाट कारवाही गरिसकेका कारण मान्यता नदिन दबाब दिएको छ ।
अधिवेशन सुरु हुनुअघि नेकपाका अध्यक्षद्वय प्रचण्ड र माधव कुमार नेपालले आज सभामुख अग्नि सापकोटालाई भेट गरेका छन् । उनीहरुले संसद सचिवालयमै पुगेर सभामुख सापकोटालाई भेटेका हुन् । बिहान ८ बजेदेखि नै संसदीय दलको आन्तरिक छलफलमा व्यस्त रहेका प्रचण्ड र नेपालले सभामुखसँग गरेको भेटलाई ओली पक्षले भने आशंकाको नजरले हेरेको छ । सभामुखसँग के छलफल भयो भन्ने कुरा भने बाहिर आएको छैन ।
ओली पक्षले प्रचण्डलाई संसदीय दलको नेता र देव गुरुङलाई मुख्य सचेतकको हैसियतमा व्यवहार गरे संसदमा सभामुख विरुद्ध आक्रमण बन्ने चेतावनी दिएको छ । ओली पक्षले आफुहरु नै आधिकारिक भएको दाबी गर्दै आएको छ ।
प्रतिक्रिया