काठमाडौं । प्रचण्ड नेपाल पक्षीय नेपाल कम्युनिष्ट पार्टी (नेकपा)को स्थायी कमिटी बैठक अहिले बसिरहेको छ ।
पार्टी कार्यालय पेरिसडाँडामा बसिरहेको बैठकमा सर्वोच्च अदालतले पार्टीको भविष्यबारे गरेको अनेपेक्षित फैसलापछि कसरी अगाडि बढ्ने भन्ने विषयमा छलफल भैरहेको छ ।
स्थायी कमिटी बैठकअघि माधव नेपाल पक्षधर स्थायी कमिटी सदस्यहरुबीच नयाँवानेश्वरस्थित अर्याल होटलमा छलफल भएको थियो । सो छलफलमा विभिन्न विकल्पमाथि सदस्यहरुले धारणा राखेको बुझिएको छ ।
सर्वोच्च अदालतले नेकपा खारेज गर्दै पूर्ववत पार्टी एमाले र माओवादी केन्द्र ब्युँताउने राजनीति प्रकृतिको फैसला गरेपछि सबैभन्दा अप्ठेरो नेपाल पक्षलाई परेको छ । ओली पक्षले नेकपा एमाले ब्यूँत्याउँने काम सुरु गरिसकेको छ भने प्रचण्ड पक्षले सर्वोच्चको आदेशअनुसार माओवादी केन्द्र प्राप्त गर्नेछ । यद्यपी, माओवादी केन्द्र अहिले गोपाल किराँतीको नाममा रहेको छ ।
ओली प्रवृति विरुद्ध लड्न एकजुट भएका नेकपाको केन्द्रीय कमिटी र संसदीय दलमा बहुतमा रहेका प्रचण्ड–नेपाल पक्षधर नेता र सांसदहरुमध्ये अब फेरि माओवादी केन्द्र र एमालेमै फर्किनुपर्ने बाध्यता आइलागेको छ । माधव पक्ष अनिच्छापूर्वक एमालेमा ओलीको नेतृत्व मानेर बस्नुपर्ने अवस्था आइलागेपछि के गर्ने भन्ने बारेमा छलफल गर्न सो समुहको अनौपचारिक बैठक बसेको हो ।
अझै पनि सर्वोच्चको फैसला पुनरावलोकनको अवस्था बाँकी नै रहेकाले सबै विकल्पहरुमा छलफल भएको छ । पुनरावलोकनमा जान सक्ने नसक्नेबारे प्रचण्ड नेपाल पक्षले आइतबार साँझ कानुनविदहरुसँग पनि छलफल गरेको थियो । उनीहरुले पुनरावलोकनमा जान सुझाव दिएका थिए ।
प्रचण्ड नेपाल पक्षको स्थायी कमिटी बैठकमा सबै कोणमा छलफल भै निर्णयमा पुगिने नेताहरुले बताएका छन् ।
प्रतिक्रिया