आजको मौसम : केही क्षेत्रमा मेघगर्जन चट्याङसहित सामान्य वर्षाको सम्भावना

काठमाडौं । स्थानीयसँगै पश्चिमी वायुको सामान्य प्रभाव रहेकाले देशका केही स्थानमा आंशिक बदली हुनेछ ।

जल तथा मौसम विज्ञान विभागको मौसम पूर्वानुमान महाशाखाका अनुसार अहिले देशको पहाडी भू-भागमा आंशिकदेखि सामान्य बदली रहेको छ भने अन्य भू-भागको मौसम सफा रहेको छ ।

दिउँसो देशको पहाडी तथा उच्च पहाडी क्षेत्रमा आंशिकदेखि सामान्य बदली रहने छ । त्यसैगरी, तराईका अधिकांश भू-भागमा पनि आंशिक बदली रहने विभागले जनाएको छ ।

देशका पहाडी भू-भागका केही स्थानमा मेघगर्जन चट्याङसहित सामान्य वर्षाको सम्भावना रहेको बताइएको छ ।

राति देश पनि देशका अधिकांश भू-भागमा आंशिकदेखि सामान्य बदली हुँदै केही स्थानमा मेघगर्जन चट्याङसहित हल्का वर्षाको सम्भावना रहेको छ ।