बुटवल । भारतमा कोरोना कहरले तिब्रता पाएसंगै नेपालमा स्वास्थ्य तथा जनसंख्या र गृह मन्त्रालयले छुट्टाछुट्टै सर्कुलर गर्दै स्वास्थ्य सतर्कता अपनाउन आग्रह गरेको छ । स्वास्थ्य मन्त्रालयको बिज्ञप्ति आए लगत्तै गृहले ७७ वटै जिल्लामा स्वास्थ्य सतर्कता र कोरोना भाइरससँग लड्न तोकिएको मापदण्ड पालना गर्न गराउन गह अन्तर्गतका कार्यालयमा निर्देन पठाएपनि गृह मातहतका कार्यालयहरुले फरक फरक जिल्लाहरुमा फरक फरक आदेश जारी गरेको छ ।
लुम्बिनी प्रदेशका बिभिन्न जिल्लाहरुमा जिल्ला प्रशासन कार्यालयले फरक फरक सुचना र निर्देशन जारी गर्दै कारोना संक्रमण नियन्त्रणमा भूमिका खेल्न आम नागरिकलाई आग्रह गरेको छ । प्रदेशको बाँकेमा अत्यावश्यक स्वास्थ्य सेवा बाहेक कुनैपनि काममा सिमा पारी भारतीय भूमिमा प्रवेश गर्न रोक लगाएको छ भने जिल्ला प्रशासन कार्यालय गुल्मीले भिडभाड, जुलुस तथा र्याली गर्न रोक लगाएको छ । रुपन्देहीमा होली पर्वमा भिडभाड नगर्न आग्रह गरेको प्रशासनले कपिलवस्तुमा पनि सिमा पारी नजान नागरिकलाई आग्रह गरेको छ ।
बुधबार बाँकेका प्रमुख जिल्ला अधिकारी राम बहादुर कुरुम्वाङको अध्यक्षतामा बसेको जिल्ला कोभिड व्यवस्थापन समिति बैठकले नेपालगन्जसँग जोडिएको भारतीय बजार रुपैडियामा किनमेलकालागि जान रोक लगाउने निर्णय गरेको छ ।
त्यसैगरी कोरोना संक्रमणलाई रोकथाम तथा नियन्त्रणका लागि बाँकेका आठ वटै स्थानीय तहलाई क्वारेन्टाइन निर्माण लगायतका आबश्यक काम अघि बढाउन जिल्ला कोभिड व्यवस्थापन समितिले निर्देशन दिएको छ ।
बैठकको निर्याय अनुसार समितिले जमुनाहस्थित सुरक्षा निकायलाई सुरक्षा व्यवस्था कडा गर्न निर्देशन समेत दिएको छ । जमुनाहमा नेपालगन्ज उपमहानगरपालिका र स्वास्थ्य कार्यालयको समन्वयमा स्वास्थ्य परिक्षणको काम शुरू भएको छ ।
भारतमा कोरोना संक्रमण बढेपछि यतबेला आम नागरि नेपाल फर्किन थालेका छन । नेपाल फर्किएका केहीमा समेत कोरोना संक्रमण देखिएको छ । यसले पनि बाँके जिल्ला उच्च जोखिमा रहेको छ ।
यता गुल्मीमा जिल्ला कोभिड–१९ संकट व्यवस्थापन केन्द्रको बुधबार बसेको बैठकले संक्रमण बढ्न नदिन स्वास्थ्य मापदण्ड पालना गर्न सूचना जारी गरेको प्रमुख जिल्ला अधिकारी रुद्रदेवी शर्माले बताइन् । केन्द्रको बैठकले आउन लागेको फागु पर्व पनि परिवारभित्र मात्रै मनाउन आग्रह गरेको छ ।
गुल्मीमा होटल, रेष्टुरेन्ट तथा मदिरा बिक्री वितरण गर्ने पसल व्यवसाय राति ८ बजेपछि बन्द गर्ने निर्णय समेत भएको छ ।
सवारी साधनमा सिट क्षमताभन्दा बढी यात्रु राख्न नपाउने पनि संकट ब्यवस्थापन केन्द्रले निर्णय गरेको प्रमुख जिल्ला अधिकारी शर्माले जानकारी दिइन् ।
जिल्ला प्रशासन कार्यालय रुपन्देहीले कोभिड–१९ को संक्रमण बढ्न नदिनका लागि नजिकै आइरहेको होलीमा भिडभाड नगर्न अनुरोध गरेको छ ।
जिल्ला प्रशासन रुपन्देहीले मंगलबार एक सूचना जारी गर्दै स्वास्थ्य मन्त्रालयबाट २०७७ चैत ८ गते जारी भएको विज्ञप्तीलाई दृष्टिगत गर्दै स्यानिटाइजर, मास्क र सामाजिक दुरी मापदण्ड तथा स्वास्थ्य सुरक्षा सम्बन्धी मापदण्डको पूर्ण पालना गर्नरगराउन आग्रह गरेको छ ।
रुपन्देहीको बेलहिया नाकामा हेल्प डेस्क स्थापना गरिएको छ । गृहले सिमामा कडाई गर्न भने पनि रुपन्देहीमा बुधबार सम्म नागरिकहरु निर्वाद किनमेलका लागि भारतीय बजार सुनौली जाने आउने गरेको पाईएको छ ।
प्रतिक्रिया