काठमाडौं । एमाले संसदीयदलका नेताको हैसियतले पहिलो पटक संसदीयदलको बैठकमा पहिलो पटक सहभागी भएका नेपाल पक्षका नेताहरुले केपी ओलीले एकलौटी गरेको निर्णय फिर्ता लिन माग गरेका छन् । उनीहरुले अध्यक्ष एवं संसदीयदलका नेता ओलीले गरेको एक्लौटी निर्णय फिर्ता नलिए पार्टी एक ढिक्का भएर परिचालित हुन नसक्ने बताएका छन् ।
आज बसेको संसदीयदलको बैठकमा बोल्दै एमाले वरिष्ठ नेता झलनाथ खनालले २०७५ जेठ २ गतेको अवस्थामा पार्टी गतिबिधि संचालनमा नआए एमाले एक ढिक्का हुने सम्भावना नभएको बताए । ‘यो भन्दा अगाडि गरिएका निर्णयहरु फिर्ता लिएर जेठ २ गते पुग्ने अवस्था सिर्जना नगरिए पार्टी एकढिक्का सहित परिचालित हुन सक्दैन’, खनालले बैठकमा भने । वरिष्ठ नेता खनाल आफ्नो कुरा राखे लगत्तै बैठकबाट बाहिरिएका थिए ।
ओलीले बोलाएको बैठकमा पहिलो पटक खनाल सहित नेपाल पक्षका अधिकांस सांसदहरु सहभागी भएका थिए । अर्का वरिष्ठ नेता माधव कुमार नेपाल र उपाध्यक्ष भिम रावल भने आजको बैठकमा पनि सहभागी भएका थिएनन् । उपाध्यक्ष बामदेव गौतम पनि आजको बैठकमा दोस्रो पटक सहभागी भएका थिए ।
प्रतिक्रिया