मुम्बइ । १४औँ संस्करणको इन्डियन प्रिमियर लिग (आइपिएल) टी-२० क्रिकेट प्रतियोगितामा दिल्ली क्यापिटल्ससँग चेन्नेई सुपर किंग्स पराजित भएको छ ।
शनिबार राति सम्पन्न खेलमा दिल्लीले चेन्नइ सुपर किङ्सलाई ७ विकेटले पराजित गरेको हो । १ सय ८९ रनको लक्ष्य पछ्याएको दिल्लीले १८.४ ओभरमा भेट्टयो । पहिलो विकेटका लागि पृथ्वी शाँ र शिखर धवनले १ सय ३८ रनको शतकीय साझेदारी गरे । ५४ बल खेलेका धवनले २ छक्का र १० चौकाको मद्धतमा ८५ रन बनाउँदै शार्दुल ठाकुरको बलमा एलबिडब्लु धरापमा परे ।
यस्तै, ३८ बलमा ३ छक्का र ९ चौकासहित शाँले ७२ रनको योगदान दिए । रिषभ पन्तले नटआउट १५ तथा मर्कूस स्टोइनिसले १४ रनको पारी खेले । यसअघि, मुम्बइस्थित वानखेडे स्टेडियममा टस हारेर पहिले ब्याटिङको निम्तो पाएको चेन्नइले निर्धारित २० ओभरमा १ सय ८८ रन बनाएको थियो ।
खराब सुरुवात गरेको चेन्नइको पारी सुरेश रैना र मोइन अलीले सम्हाल्दै ५३ रनको साझेदारी गरे । रैनाले ५४, अलीले ३६ रन बनाए । यस्तै, राम करणले ३४, रविन्द्र जडेजाले २६ तथा अम्बाती रायुडुले २३ रन जोडे । जितसँगै दिल्लीले २ अंक जोडेको छ । २ अंक जोडेको दिल्ली तालिकाको पहिलो स्थानमा रहेको छ ।
प्रतिक्रिया