काठमाडौं । नेकपा माओवादी केन्द्र दल त्याग गरेपछि सांसद पद खारेज हुँदा मन्त्रीबाट स्वतः पदमुक्त भएका रामबहादुर थापाले १२ घण्टा नवत्दिै पुनः गृहमन्त्रीमा सपथ लिएका छन् ।
राष्ट्रपति विद्यादेवी भण्डारीले गृहमन्त्री थापालाई पद तथा गोपनियताको सपथ गराएकी छिन् । राष्ट्रपति कार्यालयमा आयोजित सपथग्रहण समारोहमा गृहमन्त्री थापाले दौरासुरवारमा सजिएर सपथ लिएका छन् ।
थापाले माओवादी केन्द्र परित्याग गर्दै एमालेमा प्रवेश गरेपछि आजै बिहान मात्र उनको राष्ट्रिय सभाको सांसद पद खारेज भएको थियो । सांसद पद खारेज भएसँगै उनी गृहमन्त्रीबाट समेत पदमुक्त भएका थिए । थापा २०७४ सालमा राष्ट्रिय सभाको सांसद निर्वाचित बनेका थिए ।
सपथ ग्रहण समारोहमा प्रधानमन्त्री केपी शर्मा ओली र राष्ट्रिय सभा अध्यक्ष गणेशप्रसाद तिमिल्सिना उपस्थित थिए । तर, उपराष्ट्रपति नन्दबहादुर पुन र सभामुख अग्निप्रसाद सापकोटा भने अनुपस्थित भएका छन् ।
सांसद पद खारेज भएपनि ६ महिनासम्म मन्त्री बन्न पाउने भएका कारण प्रधानमन्त्री ओलीले थापालाई गृहमन्त्रीमा पुनर्नियुक्ति गरेका हुन् ।
प्रतिक्रिया