काठमाडौं । एमाले दोस्रो पुस्ताका नेताहरुले लगातार दवाव दिएपछि तीब्र संघर्षका मैदानमा रहेका एमाले अध्यक्ष केपी शर्मा ओली र माधवकुमार नेपाल एउटै टेवलमा बसेर भेटवार्ता गरेका छन् । पार्टी विवाद उत्कर्षमा पुगेका बेला अध्यक्ष ओली र वरिष्ठ नेता नेपालबीच नै भेट भएको भएको हो ।
आज दिउँसो नेपाल पक्षका नेता तथा पूर्वमन्त्री योगेश भट्टराई बालुवाटार पुगेर ओलीसँग लामो छलफल गरेपछि ओलीले माधव नेपाललाई भेट गर्न बोलाएका थिए ।
नागपोखरीस्थित होटल मारियटमा ओली र नेपालबीच बार्ता सुरु भएको र सो बार्तामा अर्थमन्त्री बिष्णु पौडेलको समेत सहभागीता रहेको एमालेका एक नेताले बताए ।
अध्यक्ष ओलीले पूर्व प्रधानमन्त्री नेपाल, अर्का पूर्वप्रधानमन्त्री झलनाथ खनाल लगायत पार्टीका अन्य वरिष्ठ नेताहरुसहित २७ जना सांसदलाई स्पष्टीकरण सोधेकै बेला पार्टीका दुई शीर्ष नेताबीच भेट हुनुलाई अर्थपूर्णरुपमा हेरिएको छ ।
ओलीले चलाएको कारवाही प्रक्रिया विरुद्ध नेपाल पक्षले आजै सर्वोच्च अदालतमा रिट निवेदन दर्ता गराउने प्रयास समेत गरेको छ । नेपाल पक्षले तयार गरेको रिट समयाभावका कारण भोलि बिहान दर्ता हुने नेपाल पक्षका कानुन व्यवसायीले बताएका छन् ।
नेपाल पक्षका नेताहरुलाई कारबाही गर्ने अन्तिम तयारी भइरहेको भनिएका बेला यो भेट भएको हो ।
प्रतिक्रिया