काठमाडौं । नेकपा एमालेको दसौं महाधिवेशन आयोजक कमिटीको बैठक सुरु भएको छ।
प्रधानमन्त्री निवास बालुवाटारमा केही बेर अघि सुरु भएको बैठकमा सयौं एमाले केन्द्रीय नेताहरुको उपस्थिति रहेको छ ।
प्रधानमन्त्री केपी शर्मा ओलीको अध्यक्षतामा बसेको मन्त्रिपरिषद बैठकले २५ जना भन्दा बढी मानिस एकैठाउँमा उपस्थित हुन नपाउने नियम लागु गरे पनि स्वयं प्रधानमन्त्रीकै अध्यक्षतामा यो नियमको धज्जी उडाइएको छ । फागुन २८ पछि विस्तार गरिएको एमालेको केन्द्रीय कमिटी २ सय ६५ सदस्यीय रहेको छ ।
बैठकमा माधवकुमार नेपाल पक्षीय नेताहरु भने अनुपस्थित भएका छन् । महाधिवेशन आयोजक कमिटी बैठकमा अध्यक्ष केपी शर्मा ओलीले पेस गरेको राजनीतिक प्रतिवेदन र महासचिव ईश्वर पोखरेले तयार पारेको सांगठानिक प्रस्तावमाथि छलफल हुने बताइएको छ । यो बैठकले नेताहरुको कार्यविभाजन समेत गर्नेछ ।
बैठकले नेपाल पक्षीय नेताहरुलाई थप कारवाही प्रक्रियालाई अघि बढाउनेछ । नेता नेपाल, झलनाथ खनालसहित चार २७ जना संघीय सांसद र कर्णाली प्रदेशका ५ जना सांसदलाई कारवाही गर्नैका लागि अध्यक्ष ओलीले स्पष्टीकरण सोधिसकेका छन् ।
सरकारले स्वास्थ्य मापदण्डका लागि २५ जनाभन्दा बढि जन्ती, मलामीमा समेत सहभागी हुन नपाउने नियम जारी गरेको छ। सोहि नियमअनुसार अहिले स्कूल, कलेज, फिल्म हल बन्द गरिएको छ। तर यति नै बेला प्रधानमन्त्री निवासमा भने एउटै सभाहलमा सयौं व्यक्ति सहभागी रहेको बैठक प्रधानमन्त्रीकै अध्यक्षतामा सुरु भएको हो।
प्रतिक्रिया