गण्डकी प्रदेशको कास्कीमा २ र पर्वतमा १ सहित ३ जना संक्रमितको मृत्यु

खबर कुरा
२५ बैशाख २०७८, शनिबार
                 

पोखरा । गण्डकी प्रदेशमा थप तीन जना कोरोना संक्रमितको उपचारका क्रममा मृत्यु भएको छ । कोरोना संक्रमणबाट कास्कीका दुई र पर्वतका एक जनाको मृत्यु भएको गण्डकी प्रदेश स्वास्थ्य निर्देशनालयले जनाएको छ ।

वैशाख १३ गते कोरोना संक्रमण पुष्टि भएर सोही दिनेदेखि पोखरा स्वास्थ्य विज्ञान प्रतिष्ठानमा उपचाररत पोखरा महानगरपालिका–१३ की ४८ वर्षीया महिलाको शुक्रबार बेलुका ५ः४० बजे मृत्यु भएको छ भने

शुक्रबार नै कोरोना संक्रमण पुष्टि भएर मणिपाल अस्पतालमा भर्ना भएका पोखरा महानगरपालिका–१० का ८१ वर्षीय पुरुषको सोही दिन बेलुका ७ः२५ बजे मणिपाल शिक्षण अस्पतालमा मृत्यु भएको निर्देशनालयले जनाएको छ ।

निर्देशनालयका अनुसार पर्वतको कुश्मा नगरपालिका–१ का ४० वर्षीय कोरोना संक्रमित पुरुषको शुक्रबार बेलुका ५ः१८ बजे मृत्यु भएको छ । वैशाख ७ गते कोरोना संक्रमण पुष्टि भएका ती पुरुषमा कडा खालको कोभिड निमोनिया देखिएको थियो ।

योसँगै गण्डकी प्रदेशमा कोरोना संक्रमणबाट मृत्यु हुनेको संख्या २५१ पुगेको छ ।

यसमा तपाइको मत

Your email address will not be published.


*