काठमाडौं । नेकपा एमालेको नेपाल-खनाल पक्ष अब सांसद पदबाट सामुहिक राजीनामाको विकल्प नभएको निस्कर्षमा पुगेको छ ।
पार्टी एकता वचाउनका लागि अध्यक्ष केपी शर्मा ओलीलाई अन्तिम पटक समय दिएका नेपाल पक्षले अहिले सिंहदरबारस्थित संसद सचिवालयमा भेला भएर राजीनामाबारे अन्तिम निर्णय गर्न लागेको छ ।
बिहान ९ बसेसम्मको समयमा ओलीबाट कुनै जवाफ नआएका कारण आफुहरुले संसद सचिवालयलाई राजीनामा बुझाउने तयारीमा रहेको सांसद मेटमणि चौधरीले बताएका छन् ।
‘अब हामीले कुर्ने समय सकियो, हामी सामुहिक राजीनामाको अन्तिम विकल्पमा जान बाध्य भयौं’ चौधरीले भने ।
यसअघि आइतबार बसेको नेपाल पक्षीय सांसदहरुको भेलालले पार्टीलाई नवौं महाधिवशेनको विधान, नीति र सिद्धान्तका आधारमा संचालन गर्ने गरी २०७५ जेठ २ को अवस्थामा फर्काउनका लागि अध्यक्ष ओलीसँग अन्तिम पहल गर्ने निर्णय गरेको थियो । तर, ओलीले भने नेपाल पक्षका कुनै पनि मागलाई पुरा नगर्ने संकेत उनले आइतबारै जारी गरेको विज्ञप्तिमार्फत प्रष्ट भैसकेको थियो ।
प्रतिक्रिया