संसद बैठक सुरु हुनुअघि प्रचण्ड देउवा भेट, सरकार गठनमा दाबी गर्ने समझदारी

काठमाडौं । प्रधानमन्त्री केपी शर्मा ओलीले विश्वासको मत लिने उद्देश्यले प्रतिनिधिसभाको विशेष अधिवेशन सुरु हुन लागेको छ ।

बैठक सुरु हुनुअघि नेपाली कांग्रेसका सभापति शेरबहादुर देउवा र माओवादी केन्द्रका अध्यक्ष प्रचण्डबीच छलफल भएको छ ।

दुवै पार्टीले प्रधामन्त्री ओलीले विश्वासको मत नपाउने अवस्थामा संविधानको धारा ७६ को उपधारा २ बमोजिम नयाँ सरकार गठनमा दाबी गर्ने समझदारी गरेका छन् ।

बैठकमा सहभागि कांग्रेसका प्रमुख सचेतक बालकृष्ण खाँडले पनि ओलीले विश्वासको मत नपाएपछि राष्ट्रपतिले धारा ७६ को उपधारा २ अनुसार बहुमतको सरकार निर्माण आह्वान गर्ने बताए । त्यसमा आफुहरुले दाबी गर्ने समझदारी भएको खाँडले जानकारी दिए । त्यसपछिको गतिविधिबारे पार्टीले अन्य दलसँग छलफल गर्दै निर्णयमा पुग्ने खाँडेले बताए ।

तर, एमालेको नेपाल पक्षका सांसदहरुले राजीनामा नदिएको अवस्था र जनता समाजवादी पार्टी जसपाले नयाँ सरकार गठनका लागि कुनै निर्णय गर्न नसकेका कारण धारा ७६ (२) अनुसार सरकार गठन कसरी हुन सक्ला भन्ने प्रश्न उठेको छ ।

तर, बैठकमा सहभागी माओवादी नेता वर्षमान पुनले संविधानको धारा ७६ (२) अनुसार नै दुई वा दुईभन्दा बढी दल मिलेर बहुमतको सरकार बनाउने गरी तयारी गरिएको बताए ।