काठमाडौं । नेपाली कांग्रेसका सभापति शेरबहादुर देउवाले पदाधिकारी बैठक बोलाएका छन् ।
दिउसो २ बजे नयाँ सरकार गठनबारे छलफल गर्न विपक्षी राजनीतिक दलहरुको बैठक बोलाएका सभापति देउवाले त्यसलाई स्थगित गरेर पदाधिकारी बैठक बोलाएका हुन् । बैठक दिउँसो तीन बजे देउवा निवास बुढानिलकण्ठमा बोलाइएको छ ।
प्रधानमन्त्री केपी शर्मा ओलीले सोमबार विश्वासको मत गुमाएपछि राष्ट्रपति विद्यादेवी भण्डारीले बिहीबारसम्म संविधानको धारा ७६ (२) अनुसार दुई वा दुई भन्दा बढी दलहरुको सरकार गठनका निम्ति आह्वान गरेकी छन् । दलहरुसँग छलफल गर्नुअघि पार्टीभित्र छलफल गर्ने उद्देश्यले देउवाले पदाधिकारी बैठक बोलाएका छन् ।
नयाँ प्रधानमन्त्रीका लागि दाबेदार देउवाका लागि जनता समाजवादी पार्टी जसपा एक नहुँदा गठबन्धन बनाउन समस्या भएको छ । जसपाको उपेन्द्र यादव पक्षले समर्थन जनाएपनि महन्थ ठाकुर पक्षले देउवालाई समर्थन नगर्ने स्पष्ट पारिसकेको छ । अब देउवाका लागि एमालेको माधवकुमार नेपाल पक्षले के गर्छ भन्ने विषय नै महत्वपूर्ण भएको छ । नेपाल पक्षले विपक्षी गठबन्धनलाई सहयोग गर्ने गरी काम गर्यो भने मात्र धारा ७६ २ अनुसार देउवाको नेतृत्वमा नयाँ सरकार बन्न सक्छ । अन्यथा, त्यो सम्भव देखिँदैन । राष्ट्रपति भण्डारीले पनि सरकार गठनका लागि छोटो समय दिएर कांग्रेस, माओवादीलाई थप दबाबमा पारेकी छन् ।
नयाँ सरकार निर्माणबारे सबै कोणबाट विश्लेषण गर्न देउवाले पदाधिकारी बैठक बोलाएका हुन् ।
प्रतिक्रिया