काठमाडौं । जनस्वास्थ्यविद् डा. रवीन्द्र पाण्डेले कोरोना महामारी बढ्दै गएकाले आगामी ३ हप्ता अत्यन्तै कठिन हुने देखिएको बताएका छन्। डा. पाण्डेले आगामी ३ हप्ता घरभित्रै बस्न र अति सुरक्षा अपनाउन सबैलाई सुझाव दिएका छन्।
खाद्यान्न जस्ता अत्यावश्यक सामान पनि सकभर दैनिक नकिन्न र आगामी ३ हप्ता भेटघाट बन्द गर्न उनले अनुरोध गरेका छन्।
‘आगामी ३ हप्ता नेपालका लागि अत्यन्तै कठिन अवस्था छ, दुःख सहेरै भए पनि यो ३ हप्ता घरभित्र नै बसौं,’ उनले भनेका छन्, ‘जीवनको तुलनामा दुःख सानो हो।’
पसल, बाटो, चोक, खेल्ने ठाउँ, गल्ली सबैतिर संक्रमित छन् भन्ने सम्झेर निस्किनै परे डबल मास्क लगाएर र ६ फिटभन्दा धेरै दूरी कायम गरेर गरेर मात्र निस्किन डा पाण्डेले नागरिकलाई सुझाएका छन् । यस्तै उनले हात साबुनपानी र स्यानिटाइजरले सफा गरिरहन पनि सुझाव दिएका छन्।
उनले यसपटकको कोरोना भाइरसको प्रजातिलाई नजरअन्दाज नगर्न सबैलाई चेतावनी समेत दिएका छन्।‘ यो ३ हप्ता दुःख सह्यौं भने संक्रमणको दर घट्दै जानेछ,’ डा. पाण्डे लेख्छन्, ‘रोकथामभन्दा उपचार निकै कठिन र जोखिमपूर्ण छ।’
उनले भनेका छन्, ‘सरकारले कडाइ गरेको हाम्रै लागि हो। हामी सबैजना कडा सेल्फ लकडाउनमा बसौं।’
प्रतिक्रिया