काठमाडौं । नयाँ सरकार निर्माणका लागि पहल गरिरहेका नेपाली कांग्रेसका सभापति शेरबहादुर देउवासँग जनता समाजवादी पार्टी जसपाका वरिष्ठ नेता राजेन्द्र महतोले भेटवार्ता गरेका छन् ।
बिहान सवा ११ बजेतिर देउवा निवास बूढानिलकण्ठ पुगेका महतोले सभापति देउवासँग एक्लै भेटेका छन् । यसअघि महतो जसपाका अध्यक्ष महन्ठ ठाकुरसँग हिँड्ने गर्थे । जसपाको ठाकुर महतो पक्षले नयाँ सरकार गठनमा कुनै सहभागिता नरहने बताउँदै आएको छ ।
महतोले सरकार गठनका लागि प्रयास गरिरहेका अर्का अध्यक्ष उपेन्द्र यादवलाई पार्टीबाट कारवाही गर्ने चेतावनी दिँदै आएका थिए । तर, बहुमतीय सरकार गठनको समयसीमा साँघुरिँदै गएको बेला महतोले देउवासँग गरेको छलफललाई अर्थपूर्ण मानिएको छ ।
राष्ट्रपतिले दलहरूलाई सरकार गठनका लागि दिएको समयसीमा आज राति ९ बजेबाट सकिँदैछ।
सरकार गठनबारे जसपाका शिर्ष नेताहरुबीच बुधबार पार्टी कार्यालय बालकुमारीमा छलफल भएको थियो । तर, दुवै पक्ष आआफ्नो अडानमा रहेका कारण फेरि आज बैठक बस्नेगरी स्थगित भएको थियो ।
प्रतिक्रिया