काठमाडौं । काठमाडौं रेजर्स नेपाल सुपर लिगको पहिलो च्याम्पियन बनेको छ ।
नेपालमै पहिलोपटक आयोजना भएको फ्रेन्चाइज फुटबल सुपर लिगमा शनिबार त्रिपुरेश्वरको दशरथ रंगशालामा धनगढी एफसीमाथि १-० को कठिन जित हात पार्दै काठमाडौं लिगको विजेता बनेको हो ।
काठमाडौंलाई जित दिलाउने क्रममा मेसुके ओलोमोउले निर्णायक गोल गरे । उनले पहिलो हाफको २१औं मिनेटमा विश्वास श्रेष्ठको पासमा गोल गरेका थिए । त्यही गोल नै खेलको निर्णायक बन्यो ।
योसँगै मेसुके खेलको सर्वाधिक गोलकर्ता बने। उनले प्रतियोगितामा एक ह्याट्रिकसहित ८ गोल गरेका छन्। काठमाडौंले धनगढीसँग लगातार दुई हराको पनि बदला लिन सफल भएको छ। यसअघि काठमाडौं धनगढीसँग लिग र प्लेअफमा पराजित भएको थियो।
जितसँगै काठमाडौं रेजर्सले ३५ लाख रुपैयाँ प्राप्त गर्यो भने धनगढीले १५ लाख रुपैयाँमा चित्त बुझायो । नेपाल स्पोर्ट्स एण्ड इभेन्ट म्यानेजमेन्टले अखिल नेपाल फुटबल संघ एन्फाको प्राविधिक सहयोगमा आयोजना गरेको प्रतियोगितामा ७ टिमले सिंगल राउण्ड रोविनका आधारमा प्रतिस्पर्धा गरेका थिए ।
प्रतिक्रिया