प्रतिनिधिसभा विघटन संविधान र सर्वोच्चको फैसला विपरित : सभामुख सापकोटा

खबर कुरा
८ जेष्ठ २०७८, शनिबार
                 

काठमाडौं । सभामुख अग्निप्रसाद सापकोटाले प्रधानमन्त्री चयनको विकल्प हुँदाहुँदै प्रतिनिधिसभा विघटन गरिनुलाई असंवैधानिक र अलोकतान्त्रिक भएको टिप्पणी गरेका छन् ।

शनिबार वक्तव्य जारी गर्दै सभामुख सापकोटाले संविधानको धारा ७६ (५) अनुसार वैकल्पिक सरकार गठनका लागि वस्तुगत आधार पेस भइसकेको अवस्थामा प्रधानमन्त्री नियुक्त गर्ने विकल्प रहँदारहँदै सार्वभौम प्रतिनिधिसभा विघटनको निष्कर्षमा पुग्नु कदापि स्वाभाविक र संवैधानिक कदम मान्न नसकिने सभामुखको भनाइ छ ।

सापकोटाले संविधान र सर्वोच्चको २०७७ फागुन ११ को फैसला विपरित संसद विघटन गरिएको जनाएका हुन् । सापकोटाले फैसलामा उल्लेख भएको विषय समेट्दै भनेका छन्, ‘फैसलामा ‘अन्य विकल्प हुँदाहुँदै कसैको इच्छा वा आत्मनिष्ट रुपमा देखेको आवश्यकताका आधारमा आवधिक चुनाव बाहेकको अवस्थामा जनतालाई समेत आर्थिक दायित्व पर्ने गरी प्रतिनिधिसभा विघटन गरिनु संविधानको मर्म र उद्देश्य नहुँदा त्यस्तो कार्य संविधानसम्मत हुँदैन भनेको स्मरणीय छ ।’

सभामुख सापकोटाले संवैधानिक सर्वोच्चता र लोकतन्त्रको रक्षाका लागि एकजुट हुन आह्वान पनि गरेका छन् । सापकोटाले भनेका छन्, ‘फेरि एकपल्ट, राष्ट्रिय हित, संवैधानिक सर्वोच्चता र लोकतन्त्रको रक्षाका लागि राजनीतिक दलहरू, माननीय सांसदहरू, नागरिक समाज, संविधानविद्, कानुन व्यवसायी, बुद्धिजीवी, सञ्चारजगत् तथा सम्बद्ध सबै पक्षलाई एकजुट हुन हार्दिक अपिल गर्दछुु ।’

 

 

यसमा तपाइको मत

Your email address will not be published. Required fields are marked *


*