काठमाडौं । नवौं महाधिवेशनबाट निर्वाचित नेकपा एमालेका सचिव गोकर्ण विष्टले अहिले पनि पार्टीलाई २०७५ जेठ २ गतेको अवस्थामा फर्काउन सकिने अपेक्षा गरेका छन् । उनले आज सामाजिक सञ्जालमा विचार पोष्ट गर्दै नेकपा एमाले र जनसंगठनका सबै तहका कमिटीहरुलाई २०७५ जेठ २ को पूर्ववत अवस्थामा फर्काएर पार्टी एकतालाई जोगाउने प्रयास जारी रहेको बताएका छन् ।
नेता विष्टले एमालेको एकता जोगाउन अन्तिम क्षणसम्म इमान्दार प्रयास जारी राख्ने उल्लेख गर्दै राष्ट्र, जनता, लोकतन्त्र र कम्युनिस्ट आन्दोलनको रक्षाका लागि सही विचार र कार्यदिशा अवलम्बन गरेको सवल एवं एकीकृत पार्टीले मात्रै महत्वपूर्ण जिम्मेवारी निर्वाह गर्न सक्ने बताएका छन् ।
एमालेका अध्यक्ष केपी ओलीले वरिष्ठ नेता द्वय माधव नेपाल, झलनाथ खनाल सहित ११ जनालाई निस्काशन र १२ जनालाई २४ घण्टे स्पष्टीकरण सोधिएकोमा विष्टमाथि भने कुनै कारवाहीको कदम चालिएको छैन । प्रधानमन्त्री नियुक्तिका लागि शेरबहादुर देउवालाई समर्थन गर्ने सवालमा विष्टले नेपाल पक्षमा फरकमत राखेका थिए भने सर्वोच्चमा दर्ता गरिएको रिट निवेदनमा पनि विष्टले हस्ताक्षर गरेका छैनन् । यद्देपी उनले नेपाल पक्षका १५ स्थायी समिति सदस्यहरुले बुधबार प्रकाशित गरेको प्रेस वक्तब्यमा भने हस्ताक्षर गरेका छन् ।
प्रतिक्रिया