काठमाडौं । नेपाली कांग्रेसका सभापति शेरबहादुर देउवाले राष्ट्रपतिले संविधानको पालना नगरेको आरोप लगाएका छन् ।
नेपाल प्रेस युनियनको ३१औं स्थापना दिवसमा आज भर्चुअल सम्बोधन गर्दै सभापति देउवाले आफुले संविधानको धारा ७६ ५ अनुसार बहुमत सांसदको हस्ताक्षरसहित प्रधानमन्त्री दाबी गरे पनि राष्ट्रपतिले गैरसंवैधानिक ढंगले नियुक्त नगरेको बताएका हुन् । देउवाले १४९ सांसदको हस्ताक्षर आफूले राष्ट्रपतिकहाँ बुझाएको बताउँदै राष्ट्रपतिले त्यसलाई सनाखत नगरी मध्यरातमा प्रतिनिधिसभा विघटन गरेको आरोप लगाए ।
देउवाले प्रधानमन्त्रीमा दुवै पक्षको दाबी परेपछि छलफलका लागि बोलाउनुपर्नेमा राष्ट्रपतिले त्यसो नगरी ओलीको सिफारिसमा प्रतिनिधिसभा भंग गरेको जिकिर गरे । देउवाले भने, ‘बरू राष्ट्रपतिले भेरिफाइ गरेको भए हुन्थ्यो। सांसद बोलाएको भए पनि हुन्थ्यो,’ तर राति विघटन गर्नुभयो। राष्ट्रपतिजस्तो व्यक्तिले यसरी प्रधानमन्त्रीले भन्दैमा संविधानको ठाडो उलंघन गर्नुभएको छ।’
संविधानको धारा ७५ ५ मा कुनै पनि सदस्य विश्वासको मत प्राप्त गर्ने आधार प्रस्तुत गरेमा त्यस्तो सदस्यलाई राष्ट्रपतिले प्रधानमन्त्री नियुक्त गर्नुपर्ने रहेको उनले बताए । वैकल्पिक सरकार बन्ने अवस्था हुँदाहुँदै प्रतिनिधि सभा विघटन गरेर संविधानमाथि हस्तक्षेप गरिएका कारण आफुहरु न्याय माग्न सर्वोच्चमा गएको पनि देउवाले बताए ।
प्रतिक्रिया