काठमाडौं । ‘युईएफए च्याम्पियन्स लिग’ अन्तर्गत शनिवार राति भएको फाइनल खेलमा चेल्सीले म्यान्चेस्टर सिटीलाई १-० गोलले पराजित गरेको छ ।
पोर्टोको ‘स्टेडियो डे ड्रागो’मा खेलिएको फाइनल खेलमा एकमात्र गोल चेल्सीका ‘काई हाभर्ज’ले गरे । पहिलो हाफको ४२औं मिनेटमा ‘मेसन माउन्ट’को पासलाई हाभर्जले गोलमा परिणत गर्दा चेल्सीले खेलमा अग्रता लिएको थियो ।
पहिलो हाफमा खासै खेल देखाउन नसकेको सिटीको टोलीले दोस्रो हाफमा भने दबदबा बनायो । तर चेल्सीको बलियो रक्षापंक्तिको अगाडी सिटीको केही चलेन र खेल चेल्सीले १-० गोलले आफ्नो पक्षमा पार्यो ।
यस जितसँगै चेल्सीको यो ‘दोस्रो’ च्याम्पियन्स लिग उपाधि हो। दुवै इंग्लिश टोली च्याम्पियन्स लिगको फाइनलमा भिड्दा प्रिमियर लिग विजेता म्यान्चेस्टर सिटीले पराजय भोगेको हो । गत वर्ष ‘पीएसजी’का प्रशिक्षकका रूपमा च्याम्पियन्स लिगमा उपविजेता बनेका वर्तमान चेल्सीका प्रशिक्षक ‘थोमस टुचेल’को यो पहिलो च्याम्पियन्स लिग उपाधि हो ।
त्यस्तै सन् २०११ पछिको पहिलो ‘च्याम्पियन्स लिग’ उपाधि जित्ने दाउमा रहेका सिटीका प्रशिक्षक ‘पेप ग्वार्डियोला’को सपना भने अधुरै रहेको छ । उनले अन्तिम पटक बार्सिलोनासँग च्याम्पियन्स लिगको उपाधि जितेका थिए ।
प्रतिक्रिया