काठमाडौं । नेकपा एमालेका सचिव गोकर्ण विष्टले पार्टी एकताको प्रयासलाई कमजोर पार्ने दुरासयले आफ्नो नाम जोडेर समाचार बनाईएको प्रति आपत्ति जनाएका छन् । उनले सामाजिक सञ्जाल मार्फत नेकपा एमालेको एकता जोगाउन भैरहेको प्रयासलाई कमजोर पार्ने दुराशयले आफ्नो नाम समेत जोडेर केही सञ्चार माध्यमहरूमा भ्रमपूर्ण समाचार प्रकाशित गरिरहेको बताएका छन् ।
एमालेको दोस्रो पुस्ता अन्तर्गन विष्ट सहित घनश्याम भुसाल, सुरेन्द्र पाण्डे र योगेश भट्टराईले पार्टी एकताका पक्षमा लगातार ओली पक्षसँग सम्बाद जारी राखेपछि विस्टले नेपाल खेमा त्यागेको जस्ता समाचार प्रति लक्षित गर्दै उनले आफ्नो धारणा पोष्ट गरेका हुन् ।
विष्टले पार्टी र जनसंगठनका सबै तहका कमिटीहरूलाई २०७५ जेठ २ गतेको पूर्ववत अवस्थामा फर्काएर राष्ट्र, जनता, लोकतन्त्र र कम्युनिस्ट आन्दोलनको हितमा सही विचार र कार्यदिशा सहितको सबल एवं एकीकृत कम्युनिस्ट पार्टी निर्माण गर्ने चाहना अनुसार पार्टी एकताबद्ध बनाउने प्रयासमा लागेको समेत स्पष्ट पारेका छन् । ‘एकताका लागि गरिएका इमान्दारपूर्ण प्रयासहरूलाई कमजोर पार्न कसले, किन र कसका लागि यस्ता झुठा प्रचार गराउँदै छन् ?’ उनले भनेका छन् , ‘हामी यसमा निरन्तर प्रयत्नशील छौँ । अन्तिमसम्म लागिरहनेछौँ । पार्टीको सम्पूर्ण एकता नै हाम्रो विश्वास हो । हाम्रो अडान हो ।’
विष्ट सहितको नेताहरुले एकताको प्रयास जारी राखेकै बेला आज ११ बजे एमालेको नेपाल पक्षको केन्द्रीय कमिटी बैठक बस्दैछ भने साँझ ४ बजे ओली पक्षले स्थायी कमिटीको बैठक डाकेको छ ।
प्रतिक्रिया