मन्त्रिपरिषद् पुनर्गठन असंवैधानिक : प्रचण्ड

खबर कुरा
२२ जेष्ठ २०७८, शनिबार

काठमाडौं । नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल प्रचण्डले मन्त्रिपरिषद मन्त्रिपरिषद् पुनर्गठन असंवैधानिक भएको टिप्पणी गरेका छन् ।

एकीकृत अखिल नेपाल शिक्षक सङ्गठन केन्द्रीय समितिद्वारा आज आयोजित ‘राष्ट्रिय प्रशिक्षण तथा अन्तरक्रिया कार्यक्रम’को भर्चुअल उद्घाटन गर्दै अध्यक्ष प्रचण्डले कामचलाउ सरकारले गरेको मन्त्रिपरिषद विस्तार गर्नु असंवैधानिक भएको बताएका हुन् ।

प्रचण्डले संविधान मिच्दै आएका प्रधानमन्त्री केपी ओलीले फेरि एकपटक मनलाग्दी गरेको जिकिर गरे । आफैले चुनाव घोषणा गरेर कामचलाउ बनेका ओलीले फेरि एकपटक संविधान प्रतिकूल मन्त्रिपरिषद पुनर्गठन गरेको प्रचण्डले टिप्पणी गरे ।

प्रचण्डले नेपाली मौलिकताको जनवादी क्रान्तिको कोर्स पूरा भए पनि साम्राज्यवादविरुद्धको लडाइँ बाँकी नै रहेको बताए । उनले भने, “समाजवादी क्रान्तिबाट सामन्तवादका अवशेष समाप्त पार्न कम्युनिष्ट एकता र आन्दोलनबाट मात्र सम्भव छ ।”

प्रचण्डले शिक्षकसहित समाजका धेरै वर्गका माग सम्बोधन गर्न २० प्रतिशत युवालगायतलाई नीतिगत तहमा समेटेर लैजाने अवधारणा बनाइएको बताए । उनले संविधान, लोकतन्त्र र राष्ट्रियता रक्षाका विषय जनताका बीचमा पु-याउन शिक्षकलाई आग्रह गरे । प्रचण्डले कोरोना महामारी विरुद्ध सबै एकताबद्ध भएर जुध्न पनि शिक्षकहरुलाई अनुरोध गरे ।

सो अवसरमा सङ्गठनका केन्द्रीय अध्यक्ष शङ्कर अधिकारीले सरकार र राजनीतिक दलले शिक्षकका माग बेवास्ता गरेको आरोप लगाए। अध्यक्ष अधिकारीले भने, “सेना, प्रहरी र निजामती कर्मचारीलाई विभिन्न सेवा दिँदै गर्दा यो मुलुकभित्रकै श्रमजीवी शिक्षकलाई विभेद किन गरिएको छ ?”

कार्यक्रममा सातै प्रदेशका अध्यक्षले सङ्गठनको प्रतिवेदन प्रस्तुत गरेका थिए । सो भर्चुअल ‘राष्ट्रिय प्रशिक्षण तथा अन्तरक्रिया कार्यक्रम’मा करीब एक हजार शिक्षकको सहभागिता रहेको सङ्गठनका केन्द्रीय महासचिव निमबहादुर केसीले जानकारी दिएका छन् ।

यसमा तपाइको मत

Your email address will not be published. Required fields are marked *


*