जनकपुरधाम । नेपाली कांग्रेस प्रदेश २ सरकारमा सहभागी हुनेभएको छ । कर्णाली प्रदेश सरकारमा सहभागी भएको केहीदिनभित्रै कांग्रेस प्रदेश २ सरकारमा पनि सहभागी हुनलागेको हो ।
सरकारमा सहभागिताको विषयमा बुधबार जनता समाजवादी पार्टी जसपा र कांग्रेसबीच सहमति भएको छ ।
जसपाको तर्फबाट मुख्यमन्त्री तथा संसदीय दलका नेता लालबाबु राउत र काँग्रेसको तर्फबाट संसदीय दलका नेता राम सरोज यादवले सहमतिपत्रमा हस्ताक्षर गरेका छन् ।
सहमतिपत्रमा लोकतन्त्र, संघीयता, समावेशी समानुपातिक र प्रादेशिक अधिकारको संरक्षण र सम्बर्द्धन तथा सुदृढिकरण गर्न लालबाबु राउत नेतृत्वको सरकारमा कांग्रेसको प्रदेश २ संसदीय दलका नेताको रामसरोज यादवको नेतृत्वमा सहभागी हुने उल्लेख छ ।
कांग्रेसले भौतिक पूर्वाधार तथा यातायात मन्त्रालय, ऊर्जा तथा खानेपानी र महिला, बालबालिका, युवा तथा खेलकुद मन्त्रालय लिने सहमति भएको छ । कांग्रेसबाट संसदीय दलका नेता रामसरोज यादव भौतिक पूर्वाधार, ओमप्रकाश शर्मा उर्जा र वीरेन्द्र सिंहले युवा तथा खेलकुद मन्त्रालयको जिम्मेवारी सम्हाल्नेभएका छन् ।
तीनै जनाले आजै नियुक्ति लिई सपथ समेत लिने बताइएको छ ।
जनता समाजवादी पार्टी जसपाको महन्थ ठाकुर पक्ष संघमा केपी ओली नेतृत्वको सरकारमा सहभागी भएपछि जसपामा विभाजन आएको छ । त्यसलगत्तै जसपाको उपेन्द्र यादव पक्षको बहुमत रहेको प्रदेश २ संसदीय दलले मुख्यमन्त्री लालबाबु राउतलाई दलको नेतामा चयन गरेको थियो भने राउतले ठाकुर पक्षका चार मन्त्रीलाई बर्खास्त गरेका थिए ।
ठाकुर पक्ष सरकारको विपक्षमा गएसँगै कांग्रेसको सरकारमा इन्ट्रि भएको छ । यससँगै प्रदेश २ सरकारले स्थायित्व पाउने भएको छ ।
प्रतिक्रिया