कोरोना महामारी नियन्त्रणमा नेपालको प्रयासलाई पाकिस्तानको समर्थन

इस्लामावाद । पाकिस्तानका विदेशमन्त्री शाह महमुद कुरैशीले कोरोना भाइरसको नियन्त्रणमा नेपालले चालेका कदमप्रति समर्थन जनाएका छन् ।

इस्लामावादस्थित आफ्नै कार्यालयमा पाकिस्तानका लागि नेपाली राजदूत तापस अधिकारीसँग छलफल गर्दै विदेशमन्त्री कुरैशीले महामारी नियन्त्रणमा नेपालले चालेका सबै कदममा समर्थन रहेको जनाएका हुन् ।

कुरैशीले कोरोना भाइरसको महामारीका कारण नेपालले व्यहोर्नुपरेको संकटमा दुःख व्यक्त गर्दै महामारीबाट ज्यान गुमाउनेहरुप्रति समवेदना प्रकट गरेको पाकिस्तानी विदेशमन्त्रालयद्वारा जारी विज्ञप्तिमा उल्लेख गरिएको छ ।

त्यसअवसरमा नेपाल र पाकिस्तान बीचको दुईपक्षीय सम्बन्धका विषयमा छलफल भएको छ । विदेशमन्त्री कुरैशीले आपसी हितका सबै पक्षमा सहयोग बढाउने विषयमा धारणा राखेका थिए ।

विदेशमन्त्री कुरैशीले हालै नियुक्त परराष्ट्रमन्त्री रघुवीर महासेठलाई बधाई एवं शुभकामना समेत दिएका छन् ।

कुरैशीले कोरोना महामारीका कारण नेपालमा फसेका पाकिस्तानी नागरिकलाई उद्दार गरेर गत ३१ मे मा स्वदेश फिर्ता गर्न सहयोग गरेकोमा नेपाललाई धन्यवाद दिएका छन् ।

जवाफमा राजदूत अधिकारीले दुईपक्षीय सम्बन्धलाई अझ गहिरो बनाउने बताएका छन् । उनले कोरोना सम्बन्ध सहयोग गरेकोमा पाकिस्तान सरकारलाई धन्यवाद दिएका छन् ।