बुटवल । लुम्बिनी सरकारले संसदमा पेश गरेको नीति तथा कार्यक्रमको विपक्षमा मतदान गर्न जनता समाजवादी पार्टी जसपाले आफ्ना सांसदहरुलाई ह्वीप लगाएको छ ।
जसपा संसदीय दलको तर्फबाट प्रमुख सचेतक पूरमती ढेंगा मगरले पार्टीका सांसदहरुलाई नीति तथा कार्यक्रमको विपक्षमा मतदान गर्न ह्वीप लगाएकी हुन् । नीति तथा कार्यक्रम समयसापेक्ष नभएको भन्दै मगरले कार्यक्रम असफल पार्नका लागि संसदीय दलका नेताको निर्देशनमा ह्वीप लगाएकी हुन् ।
तर, जसपाकै चार जना सांसदहरु सन्तोषकुमार पाण्डे, विजयबहादुर यादव, कल्पना पाण्डे लम्साल, सुमन शर्मा रायमाझी पार्टीको निर्देशन विपरित यसअघि नै सरकारमा सहभागी छन् । यी चारै जना सांसदहरु जसपाको महन्थ ठाकुर पक्षमा लागेका छन् । त्यसैले ह्वीप लगाइए पनि सरकारमै सहभागी भएका जसपाका चार मन्त्रीले नीति तथा कार्यक्रमको विपक्षमा मतदान गर्ने सम्भावना भने देखिँदैन ।
उनीहरुलाई जसपा केन्द्रीय कार्यकारिणीको बहुमतले पार्टी निर्देशन विपरित सरकारमा सहभागी भएको भन्दै सांसद पदबाटै निस्काशन गरेको थियो । तर, अदालतको अन्तरिम आदेशले अहिले पद थमौती भएको छ । उपेन्द्र यादवको पक्षमा र संसदीय दलका नेता सहषराम यादव र मगर मात्र रहेका छन् ।
यही जेठ २५ गते प्रदेश प्रमुख धर्मनाथ यादवले सरकारको आगामी आर्थिक वर्षको नीति तथा कार्यक्रम पेश गरेका थिए । त्यतिबेला विपक्षी दलहरु नेपाली कांग्रेस, नेकपा माओवादी केन्द्र, जसपा र राष्ट्रिय जनमोर्चाका सांसदहरुले बैठक बहिस्का रगरेका थिए ।
लुम्बिनी प्रदेशमा मुख्यमन्त्री शंकर पोखरेलको पार्टी एमालेका ३८ जना सांसद रहेका छन् । मन्त्री समेत रहेका जसपाका ४ सांसदको समर्थन मिल्ने वित्तिकै नीति तथा कार्यक्रम सजिलै पास हुन्छ ।
सबै प्रदेश सरकारहरुले प्रदेशसभाबाट पारित नीति तथा कार्यक्रमकै आधारमा आगामी असार १ गते सरकारले वार्षिक बजेट सार्वजनिक गर्ने गर्छन् ।
प्रतिक्रिया