पार्टीको आधिकारिकता दाबी गर्दै निर्वाचन आयोग जाने जसपा यादव पक्षको निर्णय, ९ मन्त्री पार्टीबाट निस्काशित

काठमाडौं । जनता समाजवादी पार्टी जसपाको उपेन्द्र बाबुराम पक्षले पार्टीको आधिकारिकताका लागि पुनः निर्वाचन आयोगमा निवेदन दिने भएको छ ।

जसपाको बिहीबार बसेको कार्यकारिणी समिति बैठकले राजनीतिक दलसम्बन्धी ऐन २०७३ को दफा ४३ र ४४ अनुसार वैधानिकता दाबी गर्दै आयोगमा पुनः निवेदन दिने निर्णय बैठकले गरेको हो ।

बैठकपछि संचारकर्मीसँग कुरा गर्दै संघीय परिषद् अध्यक्ष बाबुराम भट्टराईले पार्टीमा आफ्नो पक्ष स्पष्ट बहुमतमा भएको र पार्टीको कार्यदिशा र योजनाको पक्षमा पनि आफुहरु नै रहेकाले पार्टीको आधिकारीकता माग गर्ने निर्णय गरिएको बताए । भट्टराईले भने – ‘निर्वाचन आयोगमा हाम्रो पार्टीमा केही व्यक्तिहरुले जुन विवाद सिर्जना गरेका छन्, त्यसको निरुपणका निम्ति पार्टीको आधिकारिकताको टुंगो लगाउनलाई आयोगमा फेरि प्रस्तुत हुने भन्ने हामीले निर्णय गरेका छौँ । किनकी हाम्रो पार्टीको स्पष्ट बहुमत अहिलेपनि हामीसँग छ ।’

उपेन्द्र-बाबुराम पक्षको बहुमत रहेको कार्यकारिणीको यस अघि बसेको बैठकले अध्यक्ष महन्थ ठाकुरसहित चार जना नेतालाई पार्टीबाट निस्काशन गरेर त्यसको विवरण अद्यावधिक गर्न आयोगमा निवेदन दिएको थियो । तर, आयोगमा ठाकुर पक्षले पनि अध्यक्ष उपेन्द्र यादवलाई कारवाही गरेर विवरण सच्चाउन निवेदन दिएपछि आयोगले दुवै पक्षको निर्णय अस्वीकार गर्दै पुरानै पदाधिकारी रहने निर्णय सुनाएको थियो ।

यसैगरी जसपा कार्यकारिणी बैठकले सरकारमा सहभागी मन्त्रीहरुलाई पार्टीबाट निस्काशन गर्ने निर्णय गरेको छ । यसअघि चार जना निस्काशनमा परिसकेका छन् । यसअघि यो समूहले अध्यक्ष महन्थ ठाकुर, वरिष्ठ नेता राजेन्द्र महतो, नेताहरु सर्वेन्द्रनाथ शुक्ल र लक्ष्मणलाल कर्णलाई निष्कासन गरेको थियो । यसबाहेक सरकारमा सहभागी बाँकी नेतालाई पनि निष्कासनको निर्णय गरेको हो ।

बैठकले लुम्बिनी प्रदेशका चार जना सांसदलाई पुनः स्पष्टीकरण सोध्ने निर्णय गरेको छ । मुख्यमन्त्री शंकर पोखरेललाई साथ दिँदै लुम्बनी सरकारमा समेत सहभागी भएका चार जनाको सांसद पद प्रदेशसभा सचिवालयले खारेज गरेपनि सर्वोच्च अदालतले पुनर्बहाली गरेको थियो ।

बैठकले चुरे दोहन रोकिनुपर्ने माग गरेको छ । यस्तै, बाढी पहिरोको उद्धारका लागि खट्न नेता कार्यकर्तालाई निर्देशन दिएको छ । ब ैठकले बाढ़ी पहिरो पीड़ितलाई उद्धार र राहतका लागि सरकारसँग आग्रह गरेको छ । बैठकले पार्टीको जनपरिचालनका लागि कार्ययोजना बनाउन मृगेन्द्रसिंह यादवको संयोजकत्वमा ७ सदस्यीय कार्यदल बनाएको छ ।